ភ្នំពេញ៖ នៅចុងសប្ដាហ៍កន្លងទៅនេះ កីឡាករ កីឡាការិនី ១៨៥នាក់ បានចូលរួមប្រកួតប្រជែងលើ១១វិញ្ញាសានៃព្រឹត្តិការណ៍ប្រណាំងម៉ូតូត្រៃ ដណ្តើមជើងឯក ENEOS ឆ្នាំ២០២៦ ហើយព្រមទាំងបានបង្ហាញពីគុណភាពបច្ចេកទេសប្រកួតប្រជែងដ៏ខ្លាំងក្លាជាងមុនទៀតផង។
លោក ពេជ្រ សុខា អ្នករៀបចំព្រឹត្តិការណ៍ប្រណាំងម៉ូតូត្រៃ ដណ្តើមជើងឯក ENEOS ឆ្នាំ២០២៦ លើកឡើងថា នេះជាថ្ងៃប្រកួតដ៏ធំប្រចាំឆ្នាំនេះ ដែលមានកីឡាករ កីឡាការិនីជាតិ-អន្តរជាតិចូលរួមសរុប ១៨៥នាក់ ក្នុងនោះមានកីឡាករមកពី៩ប្រទេស ដោយបែងចែកជា១១វិញ្ញាសាតាមកម្រិតអាយុ និងClass នីមួយៗ។
លោកបន្តថា ថ្វីដ្បិតតែឆ្នាំនេះមានការឧបត្ថម្ភតិចតួចក៏ពិតមែន ប៉ុន្តែគុណភាពនៃការរៀបចំ ការគាំទ្ររបស់កីឡាករ កីឡាការិនី និងមហាជនគឺពិតជាអស្ចារ្យ ដោយសារតែការចូលរួមប្រកួតច្រើនរហូតដល់ជិត ២០០នាក់។ Class C1 កំពុងបោះជំហានរីកដុះដាលផ្នែកបច្ចេកទេសគួរឱ្យកត់សម្គាល់ បើទោះបីជានេះជាកម្រិតClass ដំបូងក៏ពិតមែន តែការចូលរួមក្នុងវិញ្ញាសានេះមានកីឡាករចូលរួមរហូតដល់ ៤០នាក់ ខណៈអ្នករៀបចំកំពុងជំរុញលើកម្រិតធនធានថ្នាលនេះឱ្យមានសន្ទុះគុណភាពកាន់តែល្អ។
ជាមួយគ្នានេះ កីឡាករបរទេសមកពីអង់គ្លេស និងកីឡាករជ័យលាភីតាម Class នីមួយៗបានបង្ហាញក្តីរីករាយ ក្នុងការចូលរួមប្រកួតប្រជែងដ៏ស្វិតស្វាយ ដែលសុទ្ធសឹងតែមានការចូលរួមពីកីឡាករលំដាប់ខ្លាំងៗតែម្តង៕
