កូនចិញ្ចឹមខ្មែររបស់ Angelina Jolie និងប្អូនស្រី បង្ហាញពីឆន្ទៈក្នុងការបញ្ឈប់ការប្រើប្រាស់នាមត្រកូលខាងភាគីឪពុក

ផ្អែកតាមឯកសារតុលាការដែលទស្សនាវដ្ដី People ទទួលបានបានបង្ហាញថាបងប្អូនប្រុសស្រីទាំងពីរនាក់បានចុះផ្សាយការប្រកាសស្នើសុំឈប់ប្រើប្រាស់នាមត្រកូលឪពុកនៅលើកាសែតក្នុងស្រុកមួយ ​ជាផ្នែកមួយនៃនីតិវិធីផ្លូវច្បាប់របស់រដ្ឋកាលីហ្វ័រញ៉ា ដែលតម្រូវឱ្យបុគ្គលចង់ប្តូរឈ្មោះ ត្រូវចេញមុខមកលាតត្រដាងពីហេតុផលតាមរយៈសារព័ត៌មាននៅក្នុងតំបន់។

តាមនោះដែរ ម៉ាត់ដក្ស (Maddox) វ័យ ២៤ ឆ្នាំ និង សាហារ៉ា (Zahara) វ័យ ២១ ឆ្នាំ សុទ្ធតែបានបង្ហាញពីឆន្ទៈក្នុងការបញ្ឈប់ការប្រើប្រាស់នាមត្រកូលខាងភាគីឪពុក ដោយបានដាក់ពាក្យបណ្តឹងតវ៉ាជាផ្លូវការ រួមជាមួយការប្រកាសតាមផ្លូវច្បាប់តាមរយៈសារព័ត៌មាន Los Angeles Daily Journal ស្របតាមបទប្បញ្ញត្តិនៃរដ្ឋកាលីហ្វ័រញ៉ា។ ក្នុងនោះ Maddox ដែលជាកូនប្រុសច្បងនិងមានដើមកំណើតខ្មែរបានស្នើសុំប្រើប្រាស់ឈ្មោះថា ម៉ាត់ដក្ស ឈីវ៉ាន់ ចូលី (Maddox Chivan Jolie) ខណៈដែល Zahara ស្នើសុំប្រើប្រាស់ឈ្មោះថា Zahara Marley Jolie ទៅថ្ងៃអនាគត។ តាមពិតទៅ អ្នកទាំងពីរក៏មិនបានប្រើប្រាស់នាមត្រកូល Pitt ក្នុងការធ្វើការងារ ឬសកម្មភាពផ្ទាល់ខ្លួនអស់មួយរយៈពេលធំមកហើយដែរ។

បច្ចុប្បន្ន ពាក្យបណ្តឹងតវ៉ារបស់អ្នកទាំងពីរមិនទាន់ត្រូវបានអនុម័តនៅឡើយទេ ព្រោះត្រូវឆ្លងកាត់នីតិវិធីនៃការស៊ើបសួរជាមុនសិន។ ក្នុងនោះ Maddox មានកាលវិភាគឡើងសវនាការស៊ើបសួររឿងប្តូរឈ្មោះនៅថ្ងៃទី ១៤ ខែកញ្ញា ខាងមុខនេះ ហើយបន្ទាប់មកគឺ Zahara ដែលមានកាលវិភាគស៊ើបសួរនៅថ្ងៃទី ២៨ ក្នុងខែដដែល។

កាលពីឆ្នាំ ២០២៤ កន្លងទៅ ប្រភពព័ត៌មានមួយបានលាតត្រដាងអំពីទំនាក់ទំនងរបស់ Brad Pitt ជាមួយកូនៗថា កាលពីដំបូងឡើយ លោកនៅតែអាចទាក់ទងជាមួយតែកូនៗណាដែលមិនទាន់គ្រប់អាយុប៉ុណ្ណោះ ប៉ុន្តែបច្ចុប្បន្នកូនៗទាំងអស់បានធំដឹងក្តីក្លាយជាមនុស្សពេញវ័យតាមផ្លូវច្បាប់អស់ហើយ។ នៅក្នុងឆ្នាំដដែលនោះដែរ Shiloh ដែលជាកូនស្រីបង្កើត ហើយកាលនោះទើបតែមានអាយុគ្រប់ ១៨ ឆ្នាំ ក៏បានដាក់ពាក្យបណ្តឹងស្នើសុំបញ្ឈប់ការប្រើប្រាស់នាមត្រកូលរបស់លោកដូចគ្នា។

ខណៈអ្នកនាំពាក្យរបស់ Angelina Jolie មិនបានឆ្លើយតបអ្វីអំពីការចុះផ្សាយនេះ ប្រភពជិតដិតម្នាក់របស់ Brad Pitt បានទម្លាយប្រាប់ប្រព័ន្ធផ្សព្វផ្សាយ People ថា៖

«នេះគឺជាលទ្ធផលនៃការបង្កើតភាពរង្គោះរង្គើឱ្យក្មេងៗប្រឆាំងនឹងអាណាព្យាបាល ដែលបានអូសបន្លាយពេលយ៉ាងយូរ។ វាជាការពិតដ៏គួរឱ្យខ្លោចចិត្តជាទីបំផុត ប៉ុន្តែក៏មិនមែនជារឿងគួរឱ្យភ្ញាក់ផ្អើលអ្វីដែរ នៅពេលដែលវាជាពេលវេលារាប់ឆ្នាំមកហើយ ដែលអាណាព្យាបាលម្ខាងបានប្រើប្រាស់កូនៗធ្វើជាអាវុធដើម្បីប្រយុទ្ធប្រឆាំងនឹងម្ខាងទៀត ដោយមិនខ្វល់ខ្វាយពីផលវិបាកដែលនឹងកើតឡើងទាល់តែសោះ»។

គួរបញ្ជាក់ថា ការផ្លាស់ប្តូរឈ្មោះនេះកើតឡើងបន្ទាប់ពីមានសេចក្ដីរាយការណ៍ជាច្រើនឆ្នាំអំពីភាពតានតឹងរវាងកូនៗ និង Brad Pitt បន្ទាប់ពីការបែកបាក់ដ៏ជូរចត់របស់លោក និង Angelina Jolie ក្នុងឆ្នាំ២០១៦ ក្រោយរៀបការបានពីរឆ្នាំ និងជាង ១០ ឆ្នាំជាគូស្នេហ៍។ ដំណើរការលែងលះរបស់ពួកគេត្រូវបានបញ្ចប់នៅក្នុងខែធ្នូ ឆ្នាំ ២០២៤ ៕