ក្រុមការងារសមត្ថកិច្ច បានរកឃើញបទល្មើសឆបោកតាមប្រព័ន្ធបច្ចេកវិទ្យា ២ករណី និងឃាត់ខ្លួនជនសង្ស័យចំនួន៣នាក់

ភ្នំពេញ​៖ ក្រោមការដឹកនាំនិងបញ្ជាផ្ទាល់របស់​ឯកឧត្តម​ ឃួង ស្រេង អភិបាលនៃគណៈអភិបាល រាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី១៦ ខែកក្កដា ឆ្នាំ២០២៦  គណៈបញ្ជាការឯកភាពរដ្ឋបាលខណ្ឌទាំង១៤ បានចុះត្រួតពិនិត្យ ៦១ទីតាំង រកឃើញជនបរទេស ស្នាក់នៅចំនួន ២៧២នាក់ មានឯកសារត្រឹមត្រូវ​ ។ ក្នុងប្រតិបត្តិការនេះ ក្រុមការងារ បានរកឃើញបទល្មើសឆបោកតាមប្រព័ន្ធ  បច្ចេកវិទ្យា ២ករណី និង​ឃាត់ខ្លួនជនសង្ស័យចំនួន​ ៣នាក់។

លោកស្រី ដោ សម្ផស្ស នាយករងរដ្ឋបាលនិងជាអ្នកនាំពាក្យរដ្ឋបាលរាជធានីភ្នំពេញ បានបញ្ជាក់ថាទាំង២ទីតាំងខាងលើនេះ រួមមាន៖

១-ទីតាំងផ្ទះល្វែងលេខ G-13 ផ្លូវហ្គូដឌី ក្នុងបរិវេនផ្សាររតនាផ្លាហ្សា ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ ឃាត់ខ្លូនជនជាតិចិន​ ០១នាក់ និងដកហូតវត្ថុតាង សម្រាប់ប្រើ​ប្រាស់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា ។

២-ទីតាំងបុរីកាណាឌីយ៉ា ផ្ទះលេខ D21 ផ្លូវឌៀលណេស ភូមិទ្រុងមាន់ សង្កាត់អូរបែកក្អម ខណ្ឌសែនសុខ ឃាត់ខ្លួនជនជាតិចិន​ ០២នាក់ និង ដកហូតសម្ភារៈសម្រាប់ប្រើ​ប្រាស់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា។

ចំពោះជនសង្ស័យ​ជាជនជាតិចិន និងសម្ភារៈវត្ថុតាងខាងលើ ត្រូវ​បានបញ្ជូនទៅនាយកដ្ឋានប្រឆាំងបទល្មើសបច្ចេកវិទ្យានៃអគ្គស្នងការនគរបាលជាតិ ដើម្បី​បន្ត​នីតិវិធី​។

លោកស្រី ដោ សម្ផស្ស ក៏បានរំលឹកផងដែរថា៖ឯកឧត្តម​ ឃួង ស្រេង អភិបាលនៃគណៈ អភិបាលរាជធានីភ្នំពេញ ក៏បានលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធទាំង អាជ្ញាធរ កងកម្លាំងមានសមត្ថកិច្ច ម្ចាស់ទីតាំង និង ប្រជាពលរដ្ឋទូទៅ សហការធ្វើយ៉ាងណា ឱ្យការបង្រ្កាបបទល្មើសឆបោកតាមប្រព័ន្ធបច្ចេកវិទ្យា (Online Scams) កាន់តែមានប្រសិទ្ធិភាព៕ ដោយ​៖ជុំ​សុវុទ្ធី​