តារាសម្តែង ជុន ជីយ៊ុន ទទួលបានពានរង្វាន់តារាអាស៊ីដ៏អស្ចារ្យ នៅមហោស្រពភាពយន្តអាស៊ីញូវយ៉កសម្រាប់រឿង "ខ្មោចឆៅពីនរក"

តារាសម្តែង ជុន ជីយ៉ុន (Jun Ji Hyun) បានទទួលពានរង្វាន់ Extraordinary Star Asia Award នៅក្នុងមហោស្រពភាពយន្តអាស៊ីនៅញូវយ៉ក (NYAFF) លើកទី ២៥ សម្រាប់តួនាទីរបស់នាងនៅក្នុងខ្សែភាពយន្តរឿង 'ខ្មោចឆៅពីនរក Colony' ដែលជាខ្សែភាពយន្តដំបូងរបស់នាងក្នុងរយៈពេល ១១ ឆ្នាំ។

នៅថ្ងៃទី១២ ខែកក្កដា អ្នកចែកចាយ Showbox និងភ្នាក់ងារ PEACHY របស់ Jun Ji Hyun បានប្រកាសពីពានរង្វាន់នេះ។ ពិធីប្រគល់រង្វាន់នេះផ្តល់ជូនដល់តារាសម្តែងដែលបានចូលរួមចំណែកគួរឱ្យកត់សម្គាល់ដល់វិស័យភាពយន្តអាស៊ី។

មហោស្រពភាពយន្តលើកទី 25 បានជ្រើសរើសរឿង "Colony" ដែលនៅក្នុងភាសាខ្មែរហៅថា ខ្មោចឆៅពីនរក ជាខ្សែភាពយន្តបើកឆាករបស់ខ្លួន។ Jun Ji Hyun និងអ្នកដឹកនាំរឿងរថភ្លើងទៅប៊ូសាន Yeon Sang Ho បានចូលរួមការចាក់បញ្ចាំងដើម្បីស្វាគមន៍ទស្សនិកជនជាពិសេស។

រឿង "Colony" គឺជាខ្សែភាពយន្តបែបផ្សងព្រេងរស់រានមានជីវិត ដែលតាមដានអ្នករស់រានមានជីវិតដែលត្រូវជាប់គាំងនៅក្នុងអគារបិទជិតមួយ ប្រឆាំងនឹងបុគ្គលដែលមានមេរោគដែលវិវត្តន៍តាមរបៀបដែលមិនអាចទាយទុកជាមុនបាន។ Jun Ji Hyun ដើរតួជាវេជ្ជបណ្ឌិតសាស្រ្តាចារ្យ Kwon Se Jeong ដែលជាអ្នកដឹកនាំក្រុមអ្នករស់រានមានជីវិតក្នុងអគារនោះ។

ភាពយន្តនេះក៏មានការចូលរួមសម្តែងដោយតារានាំមុខ Koo Kyo Hwan, Ji Chang Wook, Shin Hyun Been, Kim Shin Rok និង Go Soo ផងដែរ។