បំឡែងអាគុយឆក់ត្រី ចៃដន្យឆក់ស្លាប់ខ្លួនឯងនៅក្នុងបឹង

កណ្តាល៖ជនរងគ្រោះម្នាក់ បានស្លាប់បាត់បង់ជីវិត ដោយបំឡែងភ្លើងអាគុយ ១២វ៉ុល ជាមួយដុំអាំងវិចទរ័ ឡើងដល់ ២២០វ៉ុលដើម្បីឆក់ត្រីយកមកធ្វើម្ហូប ហើយ ហេតុការណ៍នេះ បានកើតឡើងកាលពីវេលាម៉ោង ០១និង៣០នាទីរំលងអាធ្រាត ឆ្លងចូលថ្ងៃទី០១ ខែកក្កដា ឆ្នាំ២០២៦ នៅចំណុចបឹងរាំងតាតូច ស្ថិតក្នុងភូមិព្រែកលួង សង្កាត់ព្រែកលួង ក្រុងអរិយក្សត្រ ខេត្តកណ្តាល  ។ 

      លោកវរៈសេនីយត្រី ហេង សេងហៀង នាយប៉ុស្តិ៍នគរបាលរដ្ធបាលព្រែកលួង បានឲ្យដឹងថាបុរសជាជនរងគ្រោះមានឈ្មោះ ម៉ិច ចាន់រី  អាយុ៤៤ ឆ្នាំ (ស្លាប់) ជនជាតិខ្មែរ មុខរបរនេសាទត្រី មានទីលំនៅក្នុងភូមិសង្កាត់កើតហេតុ ។ ចំណែកស្លាកស្នាមនិងវត្ថុតាងរួមមាន៖ អាគុយ ៤០ អំពែរ័ ចំនួន០១គ្រឿង -ដុំអាំងវិចទរ័បំឡែងភ្លើង០១គ្រឿង-ដងឆក់ធ្វើអំពីឬស្សីពីងពុង ចំនួន០២ដើម ខាងចុងជាដែក- និងខ្សែភ្លើងប្រវែង ០៣ម៉ែត្រ ។ 

     លោកនាយប៉ុស្តិ៍ បន្តទៀតថា នៅវេលាកើតហេតុ ក្រោយទទួលបានព័ត៌មានភ្លាម លោក បានគោរពរាយការណ៍ជូនលោកអធិការក្រុងអរិយក្សត្រ បញ្ជាឲ្យកម្លាំងជំនាញសហការជាមួយកម្លាំងប៉ុស្តិ៍  អាជ្ញាធរមូលដ្ធាននិងលោកគ្រូពេទ្យ ចុះទៅពិនិត្យដល់កន្លែង កើតហេតុ។

     តាមការបំភ្លឺរបស់សាក្សី ឈ្មោះ ញ៉ក់ ចាន់ថុល ភេទប្រុសអាយុ៤៤ឆ្នាំ ដែលទៅបូមទឹកដាក់ស្រូវ នៅមុនកើតហេតុ គឺឃើញជនរងគ្រោះបានទៅឆក់ត្រីនៅខាងក្រោយការដ្ឋានបូមខ្សាច់ ហើយ ឈ្មោះ ខែម ក៏កំពង់ដើររកជនរងគ្រោះ ទើបអ្នកទាំងពីរ បាននាំគ្នាដើររកជនរងគ្រោះ  ដោយស្រែកហៅឈ្មោះផងក៏មិនលឺតបឆ្លើយ និងក៏បានដើររកដល់កន្លែងជនរងគ្រោះឆក់ត្រី ក៏បានឃើញភ្លើងពិលបញ្ចាំងឡើងលើនិងក៏បានឃើញជនរងគ្រោះដួល ផ្កាប់មុខរបូតភ្លើងពិលចេញពីក្បាល អាគុយធ្លាក់មកចំហៀងខ្លួន។

ពួកគាត់ក៏បានយកឈើ ឆ្កឹះខ្សែភ្លើងចេញ និង បានចុះទៅស្រង់ជនរងគ្រោះឡើងមកលើគោក ជួយធ្វើចលនាបេះដូង តែជនរងគ្រោះ បានស្លាប់បាត់ទៅហើយ!  ទើបទៅហៅសាច់ញ្ញាតិ និងរាយការណ៍ជូនអាជ្ញាធរនិងសមត្ថកិច្ច ។ 

ក្រោយសមត្ថកិច្ចជំនាញ ពិនិត្យធ្វើកោសល្យវិច្ច័យ និងយោងលោកគ្រូពេទ្យ បានដាក់ សេចក្តីសន្និដ្ធានថា ជនរងគ្រោះស្លាប់ដោយសារ ឆក់ចរន្តអគ្គីសនីបំឡែងអាគុយ ឆក់ត្រី ។  សាកសពជនរងគ្រោះ ត្រូវបានប្រគល់ជូនក្រុមគ្រួសារយកធ្វើបុណ្យតាមប្រពៃណី ៕

ដោយ​៖ប៉ែន​ឆន