អ្នកនាង ម៉េង កែវពេជ្ជតា បង្ហាញមោទកភាព ខណៈកូនប្រុសច្បងបួសជាភិក្ខុ ក្រោយបញ្ចប់ការសិក្សានៅប្រទេសបារាំង

តារាចម្រៀងជើងចាស់ដ៏ល្បីល្បាញ អ្នកនាង ម៉េង កែវពេជ្ជតា បានបង្ហាញអារម្មណ៍ពោរពេញដោយមោទកភាព និងសេចក្តីសោមនស្ស បន្ទាប់ពីកូនប្រុសច្បងរបស់អ្នកនាង បានសម្រេចចិត្តចូលបួសជាភិក្ខុ ដើម្បីបំពេញកត្តញ្ញូ និងសាងកុសល ក្រោយពីបានបញ្ចប់ការសិក្សានៅប្រទេសបារាំងអស់រយៈពេលជាច្រើនឆ្នាំ។

តាមការបង្ហោះរបស់អ្នកនាង ម៉េង កែវពេជ្ជតា បានឱ្យដឹងថា គិតមកដល់ពេលនេះ លោក រតនៈ បានបួសអស់រយៈពេល ២ ថ្ងៃហើយ។ ក្នុងឱកាសនោះ អ្នកនាង រួមជាមួយកូនៗ បាននាំយកភេសជ្ជៈ និងបច្ច័យដែលបានមកពីអ្នកគាំទ្រ ទៅប្រគេនដល់លោកកូន ដើម្បីចូលរួមក្នុងបុណ្យកុសល។

អ្នកនាងក៏បានថ្លែងអំណរគុណដល់បងប្អូន ដែលបានចំណាយពេលមកចូលរួមពិធីបួសលោករតនៈ ព្រមទាំងបានប្រគេនបច្ច័យ ដើម្បីភ្ជាប់និស្ស័យក្នុងការធ្វើបុណ្យកត្តញ្ញូជាមួយក្រុមគ្រួសារផងដែរ។

ក្រោយការចែករំលែកដំណឹងនេះ អ្នកគាំទ្រជាច្រើនបានចូលទៅបញ្ចេញមតិអបអរសាទរ និងសរសើរចំពោះការសម្រេចចិត្តរបស់លោករតនៈ ដោយចាត់ទុកថា ការចូលបួសក្រោយបញ្ចប់ការសិក្សា គឺជាការបំពេញកត្តញ្ញូដ៏ប្រពៃ និងជាគំរូល្អសម្រាប់យុវជន។ ជាមួយគ្នានោះ មហាជនក៏បានជូនពរឱ្យលោករតនៈ ទទួលបានបុណ្យកុសល សេចក្តីសុខ និងសម្រេចបាននូវគោលបំណងក្នុងផ្លូវព្រះពុទ្ធសាសនា។

ការចូលបួសរបស់លោករតនៈ មិនត្រឹមតែនាំមកនូវសេចក្តីរីករាយ និងមោទកភាពដល់ក្រុមគ្រួសារប៉ុណ្ណោះទេ ប៉ុន្តែថែមទាំងទទួលបានការកោតសរសើរ និងការគាំទ្រពីអ្នកគាំទ្រ និងមហាជនជាច្រើន ដែលបានចាត់ទុកថា ជាទង្វើដ៏ប្រពៃ ស្របតាមទំនៀមទម្លាប់ និងគន្លងព្រះពុទ្ធសាសនារបស់ខ្មែរ។