កញ្ញា ប៉ូ គីមថេងសុធីតា លើកប្រធានបទ “បញ្ឈប់ការមាក់ងាយលើប្រព័ន្ធអ៊ីនធឺណិត (Cyberbullying)” ដើម្បីតស៊ូមតិក្នុងវេទិកា Miss Cosmo Cambodia 2026
ក្នុងនាមជាបេក្ខនារី Miss
Cosmo Cambodia 2026 កញ្ញា ប៉ូ
គីមថេងសុធីតា (Sothida Pokimtheng) បានជ្រើសរើសប្រធានបទ «បញ្ឈប់ការមាក់ងាយលើប្រព័ន្ធអ៊ីនធឺណិត (Cyberbullying)»
ជាគម្រោងតស៊ូមតិ (Advocacy
Project) របស់ខ្លួន
ដោយមានបំណងលើកកម្ពស់ការយល់ដឹង
និងជំរុញឱ្យសង្គមចូលរួមបង្កើតបរិយាកាសឌីជីថលដែលពោរពេញដោយការគោរព សុវត្ថិភាព
និងការយល់ចិត្តគ្នាទៅវិញទៅមក។
ស្របទៅនឹងទស្សនវិស័យរបស់
Miss
Cosmo Cambodia ដែលលើកទឹកចិត្តឱ្យស្ត្រីសម័យថ្មីក្លាយជាអ្នកដឹកនាំការផ្លាស់ប្តូរជាវិជ្ជមានក្នុងសង្គម
កញ្ញា សុធីតា ជឿជាក់ថា ពាក្យសម្ដី និងសារនីមួយៗដែលបង្ហោះលើបណ្តាញសង្គម
អាចមានឥទ្ធិពលយ៉ាងខ្លាំងទៅលើជីវិត និងសុខុមាលភាពផ្លូវចិត្តរបស់មនុស្សម្នាក់។
ដូច្នេះ មុននឹងសរសេរ ឬចែករំលែកអ្វីមួយ គ្រប់គ្នាគួរគិតឱ្យបានម៉ត់ចត់
ព្រោះពាក្យមួយឃ្លា អាចក្លាយជាកម្លាំងលើកទឹកចិត្ត
ឬក៏អាចបង្កជាស្នាមរបួសផ្លូវចិត្តដែលពិបាកជាសះស្បើយ។
តាមរយៈយុទ្ធនាការ “Think
Before You Type” កញ្ញា សុធីតា
មានគោលបំណងផ្សព្វផ្សាយអំពីការប្រើប្រាស់បណ្តាញសង្គមប្រកបដោយទំនួលខុសត្រូវ
លើកកម្ពស់វប្បធម៌នៃការគោរពគ្នា ការបង្ហាញមតិដោយសុជីវធម៌
និងការរួមគ្នាទប់ស្កាត់ការបៀតបៀនតាមប្រព័ន្ធអ៊ីនធឺណិត
ដែលកំពុងប៉ះពាល់ដល់មនុស្សជាច្រើន ជាពិសេសយុវជន និងស្ត្រី។
សម្រាប់កញ្ញា សុធីតា
ភាពស្រស់ស្អាតពិតប្រាកដ មិនមែនវាស់វែងត្រឹមរូបរាងខាងក្រៅនោះទេ
ប៉ុន្តែជាសមត្ថភាពក្នុងការប្រើប្រាស់សំឡេង និងឥទ្ធិពលរបស់ខ្លួន
ដើម្បីបង្កើតការផ្លាស់ប្តូរដ៏មានន័យសម្រាប់សង្គម។ ការលើកយកប្រធានបទនេះ
មិនត្រឹមតែជាការបង្ហាញពីការយកចិត្តទុកដាក់ចំពោះបញ្ហាសង្គមបច្ចុប្បន្នប៉ុណ្ណោះទេ
ប៉ុន្តែក៏ជាការអំពាវនាវឱ្យមនុស្សគ្រប់រូបចូលរួមបញ្ឈប់ការមាក់ងាយលើអ៊ីនធឺណិត
និងរួមគ្នាសាងសង់សហគមន៍អនឡាញដែលពោរពេញដោយភាពវិជ្ជមាន ការគោរព និងក្តីមេត្តា។
គួរជម្រាបជូននេះ
នេះជាការត្រឡប់មកវិញក្នុងរយៈពេល ៥ ឆ្នាំរបស់កញ្ញា ប៉ូ គីមថេងសុធីតា
អតីតបវរកញ្ញាឯកដែលធ្លាប់ទទួលបានប្រជាប្រិយភាពខ្ពស់ពីសំណាក់អ្នកគាំទ្រក្នុងវិស័យបវរកញ្ញាក្នុងប្រទេសកម្ពុជា។
ការបោះជំហានមកកាន់ Miss Cosmo Cambodia ជាវេទិកាដ៏ថ្មីសន្លាងសម្រាប់តារាស្រីរូបនេះ ដែលរូបនាងបានកំពុងបង្ហាញពី Version
ថ្មីរបស់ខ្លួនឱ្យមហាជនបានភ្ញាក់ផ្អើលទៀតផង។
នាងសង្ឃឹមថាពុកម៉ែបងប្អូន នឹងបន្តរួមគ្នាផ្តល់កម្លាំងចិត្តដល់រូបនាងនៅក្នុងដំណើរដ៏មានការប្រកួតប្រជែងយ៉ាងខ្លាំងនេះផងដែរ។
Miss Cosmo Cambodia 2026 បន្តបង្ហាញពីបេសកកម្មរបស់ខ្លួន
ក្នុងការស្វែងរកស្ត្រីដែលមិនត្រឹមតែមានសម្រស់ និងទេពកោសល្យប៉ុណ្ណោះទេ
ប៉ុន្តែថែមទាំងមានចក្ខុវិស័យ ភាពក្លាហាន និងការប្តេជ្ញាចិត្តក្នុងការប្រើប្រាស់វេទិការបស់ខ្លួន
ដើម្បីជំរុញការផ្លាស់ប្តូរជាវិជ្ជមានដល់សង្គម។
Miss Cosmo Cambodia 2026 នឹងប្រារព្ធរាត្រីនៃការប្រកួតបឋម នៅថ្ងៃទី ៧ ខែសីហា និងរាត្រីគ្រងម្កុដ នៅថ្ងៃទី ៨ ខែសីហា ឆ្នាំ២០២៦ ជាមួយនឹងការប្រកាសបើកលក់សំបុត្រចូលទស្សនាហើយ ចាប់ពីពេលនេះតទៅ៕
