G-Devith និង ទេព បូព្រឹក្ស បន្តពង្រីកអាជីវកម្ម ត្រៀមបើក Mart ថ្មី ចំពេលគម្រប់ក្ដីស្នេហ៍ ១១ ឆ្នាំ របស់អ្នកទាំងពីរ

 គូស្វាមីភរិយាតារាចម្រៀងដ៏ល្បី លោក ងួន ចាន់ដាវីត (G-Devith) និងអ្នកនាង ទេព បូព្រឹក្ស កំពុងទទួលបានការចាប់អារម្មណ៍ពីមហាជនជាថ្មី បន្ទាប់ពីបង្ហាញដំណឹងល្អអំពីការត្រៀមបើក Mart ថ្មីមួយ ដែលជាការពង្រីកវិស័យអាជីវកម្មរបស់ពួកគេបន្ថែមទៀត។

អស់រយៈពេលជាច្រើនឆ្នាំមកនេះ G-Devith និង ទេព បូព្រឹក្ស មិនត្រឹមតែទទួលបានភាពជោគជ័យលើវិថីសិល្បៈប៉ុណ្ណោះទេ ប៉ុន្តែថែមទាំងក្លាយជាគូស្វាមីភរិយាវ័យក្មេងដែលទទួលបានជោគជ័យក្នុងការធ្វើជំនួញផងដែរ។ ក្រៅពីការប្រគំតន្ត្រី និងការផលិតបទចម្រៀងដែលមានអ្នកគាំទ្រយ៉ាងច្រើនទាំងក្នុង និងក្រៅប្រទេស អ្នកទាំងពីរបានវិនិយោគលើមុខជំនួញជាច្រើន រួមមានផលិតផលគ្រឿងសម្អាង សាប៊ូ ទឹកអប់ និងផលិតផលថែរក្សាសម្រស់ផ្សេងៗ ដែលទទួលបានការគាំទ្រពីអតិថិជនជាបន្តបន្ទាប់។

ថ្មីៗនេះ អ្នកគាំទ្រកាន់តែរំភើប បន្ទាប់ពីអ្នកទាំងពីរបានបង្ហាញថា កំពុងត្រៀមសម្ពោធ Mart ថ្មីមួយ ដែលត្រូវបានគេចាត់ទុកថា ជាជំហានថ្មីនៃការពង្រីកអាជីវកម្ម និងបង្ហាញពីចក្ខុវិស័យវែងឆ្ងាយក្នុងវិស័យពាណិជ្ជកម្ម។

អ្វីដែលធ្វើឱ្យដំណឹងនេះកាន់តែមានអត្ថន័យ គឺការប្រកាសនេះបានចំថ្ងៃគម្រប់ស្នេហា ១១ ឆ្នាំរបស់អ្នកទាំងពីរ។ ក្នុងឱកាសដ៏ពិសេសនេះ អ្នកនាង ទេព បូព្រឹក្ស បានបង្ហោះសារមួយនៅលើបណ្ដាញសង្គម ដោយបង្ហាញពីអារម្មណ៍រំភើប និងមោទនភាពចំពោះសមិទ្ធផលដែលអ្នកទាំងពីរបានកសាងរួមគ្នា។ អ្នកនាងបានសរសេរថា៖

«❤️ប្តីរកប្រពន្ធរក ឆ្នាំនេះពួកយើងសំរេចបំណងប្រាថ្នាធំៗច្រើនណាស់❤️ G-Devith បើចំថ្ងៃ Anniversary 11 ឆ្នាំយើងម៉ងទៅអី🥰»

សារខ្លីមួយនេះ បានបង្ហាញពីភាពរឹងមាំនៃជីវិតគ្រួសារ និងការខិតខំប្រឹងប្រែងរួមគ្នាក្នុងការកសាងទាំងអាជីពសិល្បៈ និងអាជីវកម្ម។ ក្រោយការបង្ហោះនេះ មានអ្នកគាំទ្រ និងមិត្តភក្តិក្នុងសិល្បៈជាច្រើន បាននាំគ្នាចូលទៅអបអរសាទរ និងជូនពរឱ្យអ្នកទាំងពីរ បន្តទទួលបានភាពជោគជ័យកាន់តែខ្លាំងឡើងទៀត។

គួរបញ្ជាក់ថា G-Devith និង ទេព បូព្រឹក្ស ត្រូវបានមហាជនចាត់ទុកថា ជាគូស្វាមីភរិយាមួយគូដែលទទួលបានជោគជ័យទាំងលើវិស័យសិល្បៈ និងការធ្វើអាជីវកម្ម។ ការបន្តពង្រីកមុខជំនួញរបស់ពួកគេ ត្រូវបានគេមើលឃើញថា ជាការបង្ហាញពីការត្រៀមខ្លួនសម្រាប់ការរីកចម្រើនរយៈពេលវែង និងការបង្កើតម៉ាកយីហោដែលមានសក្តានុពលនៅក្នុងទីផ្សារកម្ពុជា។