សមត្ថកិច្ចចម្រុះខេត្តស្វាយរៀង បង្ក្រាបទីតាំងសង្ស័យ Online Scams ៤កន្លែង ឃាត់ខ្លួនជនបរទេស ១២នាក់ នៅក្រុងបាវិត

ស្វាយរៀង៖ក្រោមការចង្អុលបង្ហាញពីឯ.ឧ ប៉េង ពោធិ៍សា អភិបាលខេត្តស្វាយរៀង,

នាថ្ងៃទី០៧ ខែកក្កដា ឆ្នាំ២០២៦ លោក ម៉ែន អេង អភិបាលរងខេត្តស្វាយរៀង បានដឹកនាំកម្លាំងគណៈបញ្ជាការឯកភាពក្រុងបាវិត ចុះត្រួតពិនិត្យរដ្ឋបាលចំហរ និងបង្ក្រាបទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងបុរី CK ស្ថិតនៅភូមិតាពៅ សង្កាត់បាវិត ក្រុងបាវិត ដោយបានបង្ក្រាបទីតាំងសង្ស័យចំនួន ៤កន្លែង ក្នុងនោះ ឃាត់ខ្លួនជនបរទេសសរុប ១២នាក់។

ប្រតិបត្តិការនេះ ធ្វើឡើងក្រោមការសម្របសម្រួលនីតិវិធីផ្ទាល់ពីឯ.ឧ ខាំ សុផារី ព្រះរាជអាជ្ញានៃអយ្យការអមសាលាដំបូងខេត្តស្វាយរៀង ដោយមានការចូលរួមពីលោកព្រះរាជអាជ្ញារង, លោកអភិបាលក្រុងបាវិត, លោកស្នងការរង, លោកប្រធានមន្ទីរព័ត៌មាន , លោកអភិបាលរងក្រុង, អធិការនគរបាលក្រុង, មេបញ្ជាការមូលដ្ឋានកងរាជអាវុធហត្ថក្រុង ព្រមទាំងក្រុមការងាររបស់ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងអាជ្ញាធរពាក់ព័ន្ធ។

ជាលទ្ធផល កម្លាំងសមត្ថកិច្ច បានបង្ក្រាបទីតាំងសង្ស័យចំនួន ៤កន្លែង ក្នុងនោះឃាត់ខ្លួនជនបរទេសសរុប ១២នាក់ (ស្រី ០៤នាក់) ដែលមាន ២សញ្ជាតិ រួមមាន៖ជនជាតិចិន ០២នាក់ និងជនជាតិវៀតណាម ១០នាក់។ ក្នុងប្រតិបត្តិការនេះ សមត្ថកិច្ចបានដកហូតវត្ថុតាងជាឧបករណ៍បច្ចេកវិទ្យាជាច្រើនគ្រឿង រួមមាន៖កុំព្យូទ័រ All-in-One, កុំព្យូទ័រយួរដៃ, ទូរស័ព្ទដៃចម្រុះ, លិខិតឆ្លងដែន, រថយន្តម៉ាក Mercedes Benz C300 ចំនួន ១គ្រឿង និងប្រាក់ដុល្លារអាមេរិកមួយចំនួន។

ចំពោះជនបរទេសទាំង ១២នាក់ ត្រូវបានបញ្ជូនទៅកាន់ស្នងការដ្ឋាននគរបាលខេត្តស្វាយរៀង ដើម្បីសាកសួរ និងអនុវត្តនីតិវិធីច្បាប់បន្ត ខណៈទីតាំងទាំង ៤កន្លែងខាងលើ ត្រូវបានអាជ្ញាធរសម្រេចបិទជាបណ្តោះអាសន្ន។ ក្រៅពីនេះ សមត្ថកិច្ចបានចុះត្រួតពិនិត្យរដ្ឋបាលចំហរនៅទីតាំងមួយកន្លែងទៀត ដែលរកឃើញជនបរទេសម្នាក់មានលិខិតឆ្លង ដែន និងទិដ្ឋាការត្រឹមត្រូវ។

គួរបញ្ជាក់ផងដែរថា ប្រតិបត្តិការនេះបង្ហាញពីការប្តេជ្ញាចិត្តយ៉ាងមុតមាំរបស់រដ្ឋបាលខេត្តស្វាយរៀង ក្នុងការទប់ស្កាត់ និងបង្ក្រាបរាល់បទល្មើសបច្ចេកវិទ្យា ដែលបង្កផលប៉ះពាល់ដល់សន្តិសុខសណ្តាប់ធ្នាប់សង្គម និងកិត្តិយសរបស់ប្រទេសជាតិ៕