មុខសញ្ញាលួចកាត់ខ្សែភ្លើងសូឡាSolar ត្រូវបានសមត្ថកិច្ចស្រាវជ្រាវបង្រ្កាបបាននៅស្រុករតនមណ្ឌល

National • July 27, 2026

បាត់ដំបង៖ ស្របតាមអនុសាសន៍ដ៏ខ្ពង់ខ្ពស់របស់ឯ.ឧ នាយឧត្តមសេនីយ៍ ស ថេត អគ្គស្នងការនគរបាលជាតិ និងតាមយោបល់ដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង នៅថ្ងៃទី២៦ ខែកក្កដា ឆ្នាំ២០២៦ លោកវរៈសេនីយ៍ទោ ផាន់ ឡុង អធិការនគរបាលស្រុករតនមណ្ឌលស្តីទី ដឹកនាំកម្លាំងផ្នែកជំនាញនិងកម្លាំងប៉ុស្តិ៍នគរបាលរដ្ឋបាលស្តៅ ចុះស្រាវជ្រាវនិងបង្រ្កាបករណីលួចកាត់យកខ្សែភ្លើងសូឡា Solar មួយកន្លែងស្ថិតនៅចំណុចរោងចក្របាត់ដំបងខនស៍ស៊ីមេន ស្ថិតក្នុងភូមិដូនមាយ ឃុំស្ដៅ ស្រុករតនមណ្ឌល ខេត្តបាត់ដំបង។

កិច្ចប្រតិបត្តិការខាងលើនេះធ្វើឡើង បន្ទាប់ពីទទួលបានពាក្យបណ្តឹងរបស់ជនរងគ្រោះ ជាដើមបណ្ដឹងឈ្មោះ ជួប ស៊ីម ភេទ ប្រុស អាយុ ៣៤ឆ្នាំ រស់នៅភូមិរំជៃ ឃុំស្នឹង ស្រុកបាណន់ ខេត្តបាត់ដំបង (ជាតំណាងបុគ្គលិកក្រុមហ៊ុនបាត់ដំបងខនស៍ស៊ីមេន) ពីករណីខាងលើ ដែលជនសង័្សយត្រូវបានឃាត់ខ្លួនឈ្មោះ ព្រឿម វិត ភេទប្រុស អាយុ៣៦ឆ្នាំ ទីលំនៅ បច្ចុប្បន្នភូមិព្រៃអំពរ ឃុំអណ្ដើកហែប ស្រុករតនមណ្ឌល ខេត្តបាត់ដំបង ជាមួយវត្ថុតាងដកហូតរួមមាន៖ ,ខ្សែភ្លើងសូឡាចំនួន ៧,០៦០ម៉ែត្រ ,ពិល០១ ,រណាអាដែក០១ ,កាំបិតខ្វែវ០១ និងការ៉ុង០៣។

ក្រោយពីឃាត់ខ្លួន និងសមត្ថកិច្ច បានសាកសួរ, ជនសង្ស័យខាងលើបានឆ្លើយសារភាពថាខ្លួនគេពិតជាបានធ្វើសកម្មភាពចូលលួចកាត់ខ្សែភ្លើងសូឡាក្នុងរោងចក្របាត់ដំបងខន៍ស៊ីមេនបានចំនួន០៣លើក ចាប់ពីថ្ងៃទី២២ ខែកក្កដា ឆ្នាំ២០២៦ រហូតមកពិតប្រាកដមែន ហើយ បច្ចុប្បន្នជនសង្ស័យកំពុងបន្តការរៀបចំសំណុំរឿងបញ្ជូនមកផែនជំនាញអនុវត្តតាមនីតិវិធីច្បាប់ រីឯខ្សែភ្លើងត្រូវបានប្រគល់ជូនជនរងគ្រោះវិញផងដែរ៕ រៀម សាលី