កម្លាំងកងរាជអាវុធហត្ថ បង្ក្រាបក្រុមជាប់ថ្នាំញៀនជាង20នាក់ នៅកន្លែងទិញ អេដចាយមួយកន្លែងនៅក្រុងប៉ោយប៉ែត

បន្ទាយមានជ័យ៖ កម្លាំងកងរាជអាវុធហត្ថក្រុងប៉ោយប៉ែត បង្ក្រាបក្រុមជាប់ថ្នាំញៀន ជាង20នាក់ នៅកន្លែងទិញអេដចាយមួយកន្លែងនៅថ្ងៃទី22 ខែសីហា ឆ្នាំ2026 នៅក្នុងម្តុំសាលាកូរ៉េ ភូមិប៉ោយប៉ែត សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

  អនុវត្តបានការណែនាំលោកឧត្តមសេនីយ៍ត្រី បោន ប៊ិន មេបញ្ជការកងរាជអាវុធហត្ថ ខេត្តបន្ទាយមានជ័យ និងលោកអនុសេនីយ៍ឯក តិល តៃលីវ មេបញ្ជការមូលដ្ឋានកងរាជ អាវុធហត្ថក្រុងប៉ោយប៉ែត បានចាត់តាំងលោកវរសេៈនីយ៍ត្រី គង់ រិទ្ធា មន្ត្រីនគរបាលយុត្តិធម៌មូលដ្ឋានកងរាជអាវុធហត្ថក្រុងប៉ោយប៉ែត ដឹកនាំកម្លាំងចុះប្រមូលជនអនាថាញៀនថ្នាំ បានជាបន្តបន្ទាប់ នៅថ្ងៃទី22 ខែសីហា ឆ្នាំ2026 កម្លាំងកងរាជ អាវុធហត្ថបានបង្ក្រាបបានសម្បុកក្រុមប្រើប្រាស់ថ្នាំញៀនមួយក្រុម21នាក់។

សមត្ថកិច្ចកងរាជអាវុធហត្ថក្រុងប៉ោយប៉ែត បានឲ្យដឹងថា៖កន្លែងទីតាំងទិញអេដចាយមួយកន្លែងនេះ គឺមានក្រុមអ្នកប្រើប្រាស់ថ្នាំញៀន ជាច្រើននាក់បានប្រមូលផ្តុំគ្នា ដែលបន្លំធ្វើជាអ្នកដើររើសអេតចាយពេលយប់ ហើយ បន្លំលួចទ្រព្យសម្បត្តិ៍អ្នកស្រុក

លួចសម្ភារៈមិនរើសមុខ យកមកលក់នៅទីតាំងខាងលើ។

សមត្ថកិច្ចកងរាជអាវុធហត្ថ បានប្រាប់ឲ្យដឹងទៀតថា៖ពេលចុះបង្ក្រាប រកឃើញបំណែក ម៉ូតូដែលដោះបំបែក និង ម៉ូតូដែលមានតួ នៅម៉ាស៊ីនជាច្រើនគ្រឿង ដែលកំពុងធ្វើសកម្ម ភាពដោះជាបន្តបន្ទាប់ ត្រូវបានកម្លាំងកងរាជអាវុធហត្ថក្រុងប៉ោយប៉ែតចុះបង្រ្កាប នាំក្រុម ជនសង្ស័យ និងវត្ថុតាងមករក្សាទុក នៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បី សួរនាំកសាងសំណុំរឿងបញ្ជូនទៅកាន់បញ្ជាការដ្ឋានកងរាជអាវុធហត្ថខេត្តបន្ទាយមានជ័យអនុវត្តតាមនីតិវិធី។

ចំណាត់ការរបស់សមត្ថកិច្ចកងរាជអាវុធហត្ថក្រុងប៉ោយប៉ែតដែលចុះប្រមូលជនអនាថាដែលជាប់សារធាតុញៀន(ញៀនថ្នាំ) ដែលបន្លំលួចទ្រព្យសម្បត្តិ៍អ្នកស្រុក គឺមានអបអរសាទរ ពីសំណាក់ប្រជាពលរដ្ឋនៅក្រុងប៉ោយប៉ែតជាខ្លាំង និងសុំឲ្យសមត្ថកិច្ចបន្តអនុវត្តឲ្យបាន ជាប្រចាំ ខណៈក្រុងប៉ោយប៉ែតមួយរយៈនេះឃើញមានសកម្មភាពចោរលួចប្លន់ ជាច្រើនករណី៕ (សៅនៅ)