សពជនរងគ្រោះ០៣នាក់ ដែលលិចទូកអុំសមនៅកោះប្រាក់ រកឃើញ ០២នាក់ហើយ!

កណ្តាល៖ សពជនរងគ្រោះចំនួន០៣នាក់ ដែលបានលិចទូកក្នុងពេលហាត់សម នៅចំណុចកំពង់ចម្លង កោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ត្រូវបានរក ឃើញសពចំនួន ០២នាក់ហើយ! គិតត្រឹមម៉ោង១៣និង០០នាទីថ្ងៃទី១៧ ខែសីហា ឆ្នាំ ២០២៦ ។

លោកវរៈសេនីយ៍ឯក ព្រុំ សំណាង អធិការនគរបាលស្រុកកៀនស្វាយ បានប្រាប់ឲ្យដឹងថា សពជនរងគ្រោះ ដែលបានរកឃើញចំនួន០២នាក់ មាន៖០១- ឈ្មោះ ឡុង សត្យា ភេទប្រុស អាយុ ១៤ឆ្នាំ ជនជាតិខ្មែរ មុខរបរសិស្ស មានទីលំនៅក្នុងភូមិ ភូមិធំ ឃុំភូមិធំ ស្រុកកៀនស្វាយ  រកឃើញនៅវេលាម៉ោង ១១និង៣០នាទីថ្ងៃទី១៧ ខែសីហា ឆ្នាំ២០២៦ នៅចំណុចភូមិបន្លិច ឃុំពាមមានជ័យ ស្រុកពាមរក៌ ខេត្តព្រៃវែង ដែលមានចម្ងាយពីទីតាំងហេតុ ៣៦គីឡូម៉ែត្រ, ០២- ឈ្មោះ ហួន ភីនុត ភេទប្រុសអាយុ១៤ឆ្នាំ ជនជាតិខ្មែរ មុខរបរសិស្ស មានទីលំនៅក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល រកឃើញនៅវេលាម៉ោង០៨និង៤០នាទី ក្នុងថ្ងៃជាមួយគ្នា នៅចំណុចភូមិកោះប្រាក់ ឃុំភូមិធំ ស្រុកកៀនស្វាយ ចម្ងាយពីទីតាំងកើតហេតុ ០១គីឡូម៉ែត្រ ។

សព ត្រូវបានលើកយកពីអូប័រ ដឹកតាមរថយន្តសាមុយ យកទៅលំនៅដ្ឋានដើម្បីក្រុមគ្រួសារ រៀបចំធ្វើពិធីបុណ្យ តាមប្រពៃណី ។

លោក អធិការបន្តទៀតថាលោក ឡូវ សុខសាន្ត  ប្រធានគណ:បញ្ជាការឯកភាពស្រុក នៅតែសហការជាមួយ កម្លាំងកងពល 911 ដើម្បីបន្តស្វែងរកជនរងគ្រោះទី៣ម្នាក់ទៀត ដែលនៅបាត់ខ្លួន ឈ្មោះ សួន ដូណា ភេទប្រុសអាយុ១៥ឆ្នាំ  ដែលមានទីលំនៅ ក្នុងភូមិ ភូមិធំ ឃុំភូមិធំ ស្រុកកៀនស្វាយ ខេត្តកណ្តាល ។

គួរំលឹកផងដែរថា ជនរងគ្រោះទាំង០៣នាក់ (ស្លាប់) កាលពីវេលាម៉ោង ១៤និង៣០នាទី ថ្ងៃទី១៥ ខែសីហា ឆ្នាំ២០២៦ នៅចំណុចមាត់ទន្លេមេគង្គកំពង់ចម្លង កោះប្រាក់ ក្នុង ពេលគ្នីគ្នាចំនួន១០នាក់ ខ្ចីទូកពីជាងឈើម្នាក់  ប្រភេទទូកខ្នាតអន្តរជាតិ (ចំណុះ ១២នាក់ ) យកមកអុំសម ហើយ ក៏ត្រូវទឹកទន្លេឡើងភួលមានរលកធំៗ បណ្តាលឲ្យលិច ទូក ហែលរួច ០៧នាក់ នៅរស់រានមានជីវិត និង បាត់ខ្លួន ចំនួន០៣នាក់ ដែលសន្មត់ថា ស្លាប់៕ ដោយ ៖ប៉ែន ឆន