បុរសពីរនាក់ជិះម៉ូតូឌុបគ្នាលឿនជ្រុលទៅបុករបាំងថ្មពុះចែកទ្រូងផ្លូវ បណ្ដាលឱ្យម្នាក់ស្លាប់, ម្នាក់ទៀត រងរបួសធ្ងន់

ភ្នំពេញ៖ បុរសម្នាក់ បានស្លាប់នៅនិងកន្លែងកើតហេតុភ្លាមៗ ចំណែកឯបុរសម្នាក់ទៀត រួមដំណើរជាមួយ រងរបួសធ្ងន់ត្រូវបានរថយន្តសាមុយដឹកយកទៅសង្គ្រោះបន្ទាន់ ក្រោយ ពេលពួកគេ ជិះម៉ូតូឌុបគ្នាលឿនមិនប្រយ័ត្នក៏ជ្រុលទៅបុករបាំងថ្មពុះចែកទ្រូងផ្លូវយ៉ាងពេញទំហឹង។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង២:១៥ នាទីរំលងអាធ្រាតឈានចូលថ្ងៃទី២៥ ខែសីហា ឆ្នាំ ២០២៦ ស្ថិតនៅលើផ្លូវព្រះមុនីវង្ស ចំណុចស្តុបស្ថានទូតវៀតណាម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

ប្រភពពីកន្លែងកើតហេតុ បានឲ្យដឹងថាមុនពេលកើតហេតុ គេឃើញបុរសពីរនាក់បានជិះ ម៉ូតូម៉ាកហុងដាឌ្រីមសង់ ពណ៌ខ្មៅមួយគ្រឿងពាក់ស្លាកលេខភ្នំពេញ1MF-0957 ឌុបគ្នា ធ្វើដំណើរតាមបណ្ដោយផ្លូវព្រះមុនីវង្ស ទិសដៅពីជើងទៅត្បូងក្នុងល្បឿនយ៉ាងលឿន។

លុះពេលជិះមកដល់ចំណុចកើតហេតុខាងលើខ្វះការប្រុងប្រយ័ត្នក៏ជ្រុលទៅបុករបាំងថ្មពុះចែកទ្រូងផ្លូវចំពាក់កណ្ដាលយ៉ាងពេញទំហឹង បណ្ដាលឲ្យម៉ូតូ រងការខូចខាតផ្នែកខាងមុខ ស្ទើរទាំងស្រុង។ ចំណែកឯបុរសពីរនាក់ដែលជិះម៉ូតូជាមួយគ្នា ម្នាក់បាត់បង់ជីវិតនិងម្នាក់ទៀត រងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះបន្ទាន់ភ្លាមៗផងដែរ ។

បន្ទាប់ពីកើតហេតុ សមត្ថកិច្ចជំនាញចរាចរណ៍ចុះមកធ្វើការវាស់វែងយកម៉ូតូជនរងគ្រោះទៅរក្សាទុកនៅអតិការដ្ឋាននគរបាលខណ្ឌចំការមន ជាបណ្ដោះអាសន្ន ចំណែកសពសមត្ថកិច្ច ធ្វើកំណត់ហេតុប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕ដោយ​៖សាមេត