ម៉ូតូ ២គ្រឿងបុកគ្នាពេញទំហឹង បណ្ដាលឱ្យភាគីម្ខាងស្លាប់និងម្ខាងទៀត រងរបួសស្រាល

ភ្នំពេញ៖ បុរសម្នាក់ ជិះម៉ូតូឌ្រីមសង់មួយគ្រឿងបត់ឆ្លងផ្លូវស្របពេលមានម៉ូតូមួយគ្រឿង ទៀត ម៉ាកហុងដាប៊ីត ធ្វើដំណើរមកត្រង់បុកគ្នាពេញទំហឹង បណ្តាលឲ្យភាគីម៉ូតូឌ្រីម សង់ ស្លាប់ភ្លាមៗ ចំណែកភាគីម៉ូតូ១គ្រឿងទៀត រងរបួសស្រាល។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពី​វេលាម៉ោង ១១:២០ នាទីរំលងអាធ្រាតឈានចូលថ្ងៃទី ២០ខែសីហាឆ្នាំ ២០២៦ ស្ថិតនៅលើផ្លូវព្រះនរោត្តម នៅក្នុងសង្កាត់បឹងរាំង ខណ្ឌដូននពេញ រាជធានីភ្នំពេញ។

តាមការបញ្ជាក់ពីកន្លែងកើតហេតុ បានឲ្យដឹងថាមុនពេលកើតហេតុ​ គេឃើញម៉ូតូម៉ាក ហុងដាឌ្រីមសង់ ពណ៌ខ្មៅមួយគ្រឿងពាក់ស្លាកលេខភ្នំពេញ 1LV-4000 ជិះដោយបុរស ម្នាក់ ធ្វើដំណើរតាមបណ្ដោយផ្លូវព្រះនរោត្តមទិសដៅពីត្បូងទៅជើង។

លុះពេលជិះមកដល់ត្រង់ចំណុចកើតហេតុស្តុបចតុមុខ ក៏បានបត់ឆ្វេងឆ្ពោះទៅផ្លូវ២១៤ ហើយ​ ខណៈពេលកំពុងតែជិះ​ ស្រាប់តែគេឃើញមានម៉ូតូមួយគ្រឿងទៀតម៉ាក  ហុងដា ប៊ីត ពាក់ស្លាកលេខភ្នំពេញ 1MF-0121 ជិះដោយបុរសម្នាក់ធ្វើដំណើរផ្លូវត្រង់ពីជើងទៅត្បូង ក្នុងល្បឿនលឿនក៏ជ្រុលទៅបុកចំពីមុខម៉ូតូឌ្រីមសង់យ៉ាងពេញទំហឹង​ បណ្ដាលឲ្យភាគីម្ចាស់ម៉ូតូឌ្រីមសង់ស្លាប់ៗ ចំណែកឯភាគីម្ចាស់ម៉ូតូហុងដាប៊ីត រងរបួសស្រាល ត្រូវបានសមត្ថកិច្ច ឃាត់ខ្លួនយកទៅសួរនាំ។

បន្ទាប់ពីកើតហេតុខាងលើ សមត្ថកិច្ចមូលដ្ឋានសហការជាមួយមន្ត្រីជំនាញចរាចរណ៍ក្រុង ចុះមកវាស់វែងយកម៉ូតូទាំងពីរគ្រឿង ទៅរក្សាទុកជាបណ្ដោះអាសន្ន រង់ចាំការដោះស្រាយគ្នានៅពេលក្រោយ។ ចំណែកសព សមត្ថកិច្ចធ្វើកំណត់ហេតុប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី៕ ដោយ​៖សាមេត