ក្មេងស្រី០៣នាក់ បបួលគ្នាចុះលេងទឹកទន្លេតាមកាំជណ្តើរវត្ត ចៃដន្យលង់ទឹកស្លាប់ម្នាក់

   កណ្តាល៖ មានក្មេងស្រីរងគ្រោះម្នាក់ទៀតហើយ! ដែលបានលង់ទឹកស្លាប់ ខណ:មាន គ្នីគ្នា០៣នាក់ ទៅលេងទឹកទន្លេបាសាក់ ចុះតាមកាំជណ្តើរវត្ត ដោយកើតហេតុកាលពីវេលាម៉ោង១៣និង៣០នាទីថ្ងៃទី២៨ ខែសីហា ២០២៦ នៅចំណុចមាត់ច្រាំងទន្លេបាសាក់ មុខវត្តសំប៉ាណ ស្ថិតក្នុងភូមិសំប៉ាណ ឃុំកោះធំ (ខ) ស្រុកកោះធំ ខេត្តកណ្តាល និងត្រូវបានរកសព ឃើញនៅវេលាម៉ោង ០៧និង០០នាទី ថ្ងៃទី៣០ខែសីហាឆ្នាំ២០២៦ នៅចំណុចមាត់ច្រាំងទន្លេបាសាក់ ស្ថិតក្នុងភូមិព្រែកតាកេរ ឃុំ កោះធំ(ខ) ស្រុកកោះធំ ខេត្តកណ្តាល ។

លោកវរៈសេនីយ៍ឯក ស៊ីម ឃាង អធិការនគរបាលស្រុកកោះធំ បានប្រាប់ឲ្យដឹងថា កុមារីរងគ្រោះមានឈ្មោះ ផល ដាវីន អាយុ០៩ឆ្នាំ ជនជាតិខ្មែរ ជាសិស្សរៀនថ្នាក់ទី ៣ សាលាបឋមសិក្សាសំប៉ាណ និងមានទីលំនៅក្នុងភូមិឃុំកើតហេតុ ។

យោងតាមការបំភ្លឺរបស់ឈ្មោះ ផុន សក្ខិណា ភេទស្រីអាយុ១១ឆ្នាំ ត្រូវជាមិត្តភក្តិរបស់ជនរងគ្រោះ បានរៀបរាប់ឱ្យសមត្ថកិច្ចដឹងថានៅថ្ងៃកើតហេតុ ខ្លួនមានគ្នាចំនួន០៣ (ទាំងជនរងគ្រោះផង) បាននាំគ្នាចុះមកលេងទឹកនៅមាត់ច្រាំងទន្លេបាសាក់ ត្រង់ចំណុចកើតហេតុ ដែលមានទឹកហូរគួចខ្លាំង។ ដំបូងបានដើរចុះទៅទី០២  បន្ទាប់ក៏ចុះដល់កាំទី០៣ លុះដល់វេលាកើតហេតុ គឺជនរងគ្រោះចុះបន្តមុនគេដល់កាំជណ្តើរទី០៤ ហើយក៏បានលង់ទឹកលិចក្បាលបាត់ទៅ   ពេលនោះមិត្តភគ្រ័ទាំង០២នាក់ បាននាំគ្នាស្រែកហៅឲ្យអ្នកជិតខាងដែលលក់ដូរនៅក្បែរមកជួយផង ប៉ុន្តែជនរងគ្រោះ ត្រូវបានទឹកហូរគួចលិចទៅបាត់ហើយ ។

លោកអធិការ បានបញ្ជាក់ថាក្រោយទទួលបានសេចក្តីរាយការណ៍ភ្លាម លោក ឆែ វណ្ណឌី ប្រធានគណ:បញ្ជាការឯកភាពស្រុកកោះធំ  បានដឹកនាំកម្លាំងដោយផ្ទាល់សហការជាមួយអាជ្ញាធរមូលដ្ធាន និង បងប្អូនប្រជាពលរដ្ធ ចុះហ៊ឹមរាវរក និង បានចេញទូកកាណូតស្វះស្វែងរក រហូតរកឃើញ សពកុមារីរងគ្រោះ នៅព្រឹកថ្ងៃទី៣០ខែសីហាឆ្នាំ២០២៦ នេះ ។

ក្រោយសមត្ថកិច្ចការងារយុត្តិធម៌ ជំនាញកោសលវិច្ច័យ និង យោងលោកគ្រូពេទ្យ បានពិនិត្យចប់សព្វគ្រប់ គឺរកពុំឃើញអ្វីគួឲ្យកត់សំគាល់ឡើយ ក៏បានដាក់សេចក្តីសន្និដ្ធានថា សព ពិតជាស្លាប់ដោយលង់ទឹកប្រាកដមែន និងក៏បានធ្វើកំណត់ហេតុប្រគល់ជូនក្រុមគ្រួសារដើម្បី យកទៅធ្វើបុណ្យតាមប្រពៃណី ដោយមានអនុសាខាកាកបាទក្រហមស្រុក ផ្តល់អំណោយមនុស្សធម៌ ដល់ឪពុកម្តាយរបស់កុមារីរងគ្រោះ ដល់លំនៅដ្ធាន ៕ដោយ៖ប៉ែន ឆន