ប្រធាននាយកដ្ឋានសិល្ប:ភាពយន្តនិងផ្សព្វផ្សាយវប្បធម៌ នៃក្រសួងវប្បធម៌និងវិចិត្រសិល្បៈ ចូលរួមធ្វើបទបង្ហាញពីស្តីពីការ អភិវឌ្ឍឧស្សាហកម្មភាពយន្តកម្ពុជា ក្នុងសិក្ខាសាលាថ្នាក់ជាតិស្តីពីការជំរុញទេសចរណ៍ភាពយន្តនៅកម្ពុជា

សិល្បៈភាពយន្ត មិនត្រឹមតែជាមធ្យោបាយសម្រាប់ការកម្សាន្ត និងការបង្ហាញស្នាដៃសិល្បៈប៉ុណ្ណោះទេ ប៉ុន្តែថែមទាំងអាចក្លាយជាកម្លាំងសំខាន់មួយ ក្នុងការផ្សព្វផ្សាយវប្បធម៌ ប្រវត្តិសាស្ត្រ និងសក្តានុពលទេសចរណ៍របស់ប្រទេសកម្ពុជា ទៅកាន់ពិភពលោក។

ក្នុងទិសដៅនេះ ការជំរុញទេសចរណ៍ភាពយន្ត ត្រូវបានចាត់ទុកជាវិស័យមួយដែលអាចបង្កើតឱកាសថ្មីៗ សម្រាប់ទាំងវិស័យភាពយន្ត និងវិស័យទេសចរណ៍នៅកម្ពុជា។

នាថ្ងៃទី២០ ខែសីហា ឆ្នាំ២០២៦ លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ បានអញ្ជើញចូលរួមធ្វើបទបង្ហាញស្តីពី «ការអភិវឌ្ឍឧស្សាហកម្មភាពយន្តកម្ពុជា» ក្នុងសិក្ខាសាលាថ្នាក់ជាតិ ស្តីពីការជំរុញទេសចរណ៍ភាពយន្តនៅកម្ពុជា។

សិក្ខាសាលានេះ ត្រូវបានរៀបចំឡើងនៅខេត្តសៀមរាប ក្រោមអធិបតីភាពដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងារអន្តរក្រសួង ដើម្បីសម្របសម្រួល និងគាំទ្រវិស័យទេសចរណ៍ភាពយន្ត និងការទស្សនាប្រាសាទនាពេលរាត្រីនៅកម្ពុជា។

ជាមួយគ្នានេះ ក៏មានការអញ្ជើញចូលរួមពី ឯកឧត្តម ហាប់ ទូច រដ្ឋលេខាធិការប្រចាំការ តំណាងដ៏ខ្ពង់ខ្ពស់លោកជំទាវបណ្ឌិតសភាចារ្យរដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាអនុប្រធានក្រុមការងារអន្តរក្រសួង ព្រមទាំងតំណាងក្រសួង ស្ថាប័នពាក់ព័ន្ធ វិស័យឯកជន សមាគមទេសចរណ៍ សមាគមភាពយន្តកម្ពុជា សមាគមសិល្បករ ផលិតករភាពយន្ត សិល្បករ សិល្បការិនី និងភ្ញៀវកិត្តិយសជាតិ និងអន្តរជាតិ សរុបប្រមាណជាង២០០នាក់។

នៅក្នុងបទបង្ហាញ លោក ប៉ុក បូរក្ស បានចែករំលែកទស្សនៈ និងចំណុចសំខាន់ៗពាក់ព័ន្ធនឹងការអភិវឌ្ឍឧស្សាហកម្មភាពយន្តកម្ពុជា ព្រមទាំងសក្តានុពលរបស់វិស័យភាពយន្ត ក្នុងការចូលរួមផ្សព្វផ្សាយអត្តសញ្ញាណ វប្បធម៌ និងតំបន់ទេសចរណ៍សំខាន់ៗរបស់កម្ពុជា។

ភាពយន្តអាចធ្វើជាស្ពានភ្ជាប់រវាងសិល្បៈ វប្បធម៌ និងទេសចរណ៍ ដោយតំបន់ដែលត្រូវបានបង្ហាញតាមរយៈខ្សែភាពយន្ត អាចក្លាយជាគោលដៅដែលទាក់ទាញចំណាប់អារម្មណ៍ពីអ្នកទស្សនា និងភ្ញៀវទេសចរមកពីជុំវិញពិភពលោក។

សម្រាប់កម្ពុជា ដែលមានប្រាង្គប្រាសាទបុរាណ ទេសភាពធម្មជាតិ វប្បធម៌ដ៏សម្បូរបែប និងរឿងរ៉ាវប្រវត្តិសាស្ត្រដ៏មានតម្លៃ ការប្រើប្រាស់ភាពយន្តជាឧបករណ៍ផ្សព្វផ្សាយទេសចរណ៍ អាចជួយបង្កើនការទទួលស្គាល់កម្ពុជាកាន់តែទូលំទូលាយនៅលើឆាកអន្តរជាតិ។

សិក្ខាសាលាថ្នាក់ជាតិនេះ ក៏ជាវេទិកាដ៏មានសារៈសំខាន់ សម្រាប់ការផ្លាស់ប្តូរយោបល់ និងបទពិសោធន៍ រវាងភាគីពាក់ព័ន្ធក្នុងវិស័យភាពយន្ត និងវិស័យទេសចរណ៍។

វេទិកានេះមានគោលបំណងធ្វើជាស្ពានតភ្ជាប់ និងបង្កើតកិច្ចសន្ទនា រវាងស្ថាប័នរដ្ឋ ប្រតិបត្តិករក្នុងឧស្សាហកម្មភាពយន្ត និងឧស្សាហកម្មទេសចរណ៍ ដើម្បីរួមគ្នាស្វែងរកកាលានុវត្តភាពថ្មីៗ ព្រមទាំងពិភាក្សាអំពីបញ្ហាប្រឈម និងដំណោះស្រាយដែលអាចអនុវត្តបាន។

ជាពិសេស ការចូលរួមរបស់វិស័យឯកជន ផលិតករ សិល្បករ សមាគម និងភាគីពាក់ព័ន្ធជាច្រើន នឹងអាចជួយបង្កើតបណ្តាញសហការថ្មីៗ និងជំរុញឱ្យឧស្សាហកម្មភាពយន្តកម្ពុជាកាន់តែមានភាពរស់រវើក និងប្រកួតប្រជែង។

តាមរយៈកិច្ចសហការរវាងវិស័យភាពយន្ត និងទេសចរណ៍ កម្ពុជាមានឱកាសបង្កើតផលិតកម្មភាពយន្តដែលអាចបង្ហាញពីសម្រស់ធម្មជាតិ បេតិកភណ្ឌវប្បធម៌ និងអត្តសញ្ញាណខ្មែរ ទៅកាន់ទស្សនិកជនអន្តរជាតិ។

ជាមួយគ្នានេះ ការអភិវឌ្ឍទេសចរណ៍ភាពយន្ត ក៏អាចចូលរួមបង្កើតការងារ និងឱកាសអាជីវកម្មសម្រាប់ប្រជាពលរដ្ឋ និងអ្នកប្រកបអាជីពក្នុងវិស័យសិល្បៈ ភាពយន្ត ទេសចរណ៍ និងសេវាកម្មពាក់ព័ន្ធផងដែរ។

សិក្ខាសាលានេះ គឺជាជំហានមួយបន្ថែមទៀត ក្នុងការជំរុញកិច្ចសហការរវាងភាពយន្ត និងទេសចរណ៍ សំដៅលើកកម្ពស់ឧស្សាហកម្មភាពយន្តកម្ពុជា និងផ្សព្វផ្សាយកម្ពុជាឱ្យកាន់តែមានភាពទាក់ទាញនៅលើឆាកអន្តរជាតិ។

ភាពយន្តបង្ហាញរឿងរ៉ាវកម្ពុជា… ហើយទេសចរណ៍ នាំពិភពលោកមកស្គាល់កម្ពុជា។