អតីតតារាសម្ដែង ហេង ដាលីស វិលមកកម្ពុជាជាមួយស្វាមី រំលឹកអនុស្សាវរីយ៍ស្នេហ៍ជាង ២០ឆ្នាំ

អតីតតារាសម្ដែងស្រី អ្នកនាង ហេង ដាលីស បានវិលត្រឡប់មកកាន់ប្រទេសកម្ពុជាជាមួយស្វាមី ដើម្បីចំណាយពេលវេលាដ៏មានន័យ និងរំលឹកអនុស្សាវរីយ៍ស្នេហ៍ដែលពួកគេបានរួមដំណើរជាមួយគ្នាអស់រយៈពេលជាង ២០ឆ្នាំ។

ក្រោយពីរៀបអាពាហ៍ពិពាហ៍ និងទៅរស់នៅសហរដ្ឋអាមេរិកអស់រយៈពេលជាច្រើនឆ្នាំ អ្នកនាង ហេង ដាលីស បានសាងគ្រួសារប្រកបដោយភាពកក់ក្ដៅ និងមានបុត្រប្រុសស្រីជាចំណងដៃ។ ទោះបីរស់នៅក្រៅប្រទេសក៏ដោយ អ្នកនាងនៅតែឆ្លៀតពេលវិលមកលេងប្រទេសកម្ពុជា ដែលជាទឹកដីកំណើត និងជាទីកន្លែងដែលផ្ទុកនូវអនុស្សាវរីយ៍ជាច្រើនក្នុងជីវិតរបស់អ្នកនាង។

គួររំលឹកថា អ្នកនាង ហេង ដាលីស គឺជាអតីតតារាសម្ដែងស្រីមួយរូបដែលធ្លាប់មានឈ្មោះបោះសំឡេងក្នុងវិស័យសិល្បៈខ្មែរ អំឡុងឆ្នាំ ២០០៣ ហើយបានចូលរួមចំណែកក្នុងស្នាដៃភាពយន្តកម្ពុជាជាច្រើន មុនពេលដកខ្លួនទៅរស់នៅក្រៅប្រទេស និងផ្ដោតលើជីវិតគ្រួសារ។

សម្រាប់ដំណើរមកកម្ពុជាលើកនេះ អ្នកនាង និងស្វាមីបានចំណាយពេលធ្វើដំណើរកម្សាន្តទៅកាន់តំបន់ទេសចរណ៍ធម្មជាតិ និងគោលដៅសំខាន់ៗមួយចំនួន។ ក្នុងនោះមាន ខេត្តរតនគិរី ដែលជាទីកន្លែងពិសេស ព្រោះជាខេត្តដែលភ្ជាប់ជាមួយអនុស្សាវរីយ៍ស្នេហ៍របស់អ្នកនាង និងស្វាមី ព្រមទាំងបានបន្តដំណើរទៅកាន់ ខេត្តសៀមរាប ដើម្បីទស្សនាតំបន់ទេសចរណ៍ និងផ្ដិតយកទេសភាពស្រស់ស្អាតជាច្រើនទុកជាអនុស្សាវរីយ៍។

ដំណើរមកកម្ពុជារបស់អតីតតារាសម្ដែងរូបនេះ មិនត្រឹមតែជាការសម្រាកលំហែកាយជាមួយគ្រួសារប៉ុណ្ណោះទេ ប៉ុន្តែថែមទាំងជាឱកាសសម្រាប់អ្នកនាង និងស្វាមី រំលឹកឡើងវិញនូវអនុស្សាវរីយ៍ល្អៗដែលបានកើតឡើងនៅលើទឹកដីកំណើត និងបន្តរក្សាភាពផ្អែមល្ហែមក្នុងជីវិតគូស្វាមីភរិយា។