កញ្ញា ផន ស្រីពី បង្ហាញរឿងរ៉ាវជីវិត ក្រោយគ្រងមកុដ Miss Cosmo Cambodia អស់រយៈពេល១ឆ្នាំ

កញ្ញា ផន ស្រីពី បានបង្ហាញវីដេអូមួយនិយាយរៀបរាប់ពីប្រវត្តិ និងដំណើរជីវិតរបស់ខ្លួន បន្ទាប់ពីបានគ្រងមកុដជា Miss Cosmo Cambodia អស់រយៈពេល១ឆ្នាំ។ តាមរយៈការចែករំលែកនេះ នាងបានរំឭកពីឧបសគ្គ និងការលំបាកជាច្រើនដែលខ្លួនធ្លាប់ជួបប្រទះ មុនពេលឈានមកដល់តំណែងមួយនេះ។

កញ្ញា ផន ស្រីពី បានឱ្យដឹងថា តាំងពីកុមារភាព នាងធ្លាប់ប្រឈមនឹងការរិះគន់ និងការមើលងាយពីអ្នកជុំវិញ ជាពិសេសពាក់ព័ន្ធនឹងពណ៌សម្បុរ និងរូបសម្បត្តិ។ ការមើលងាយទាំងនោះ ថែមទាំងធ្វើឱ្យនាងធ្លាប់ទទួលរងពាក្យសម្តីមិនសមរម្យ ដូចជា ការហៅថា «មីក្របី» ជាដើម។

ទោះជាយ៉ាងណា ជំនួសឱ្យការបោះបង់ក្តីស្រមៃ នាងបានព្យាយាមតស៊ូ និងជំនះរាល់ឧបសគ្គដែលបានកើតឡើងក្នុងជីវិត។ បទពិសោធន៍ទាំងនេះ ត្រូវបាននាងចាត់ទុកថា ជាផ្នែកមួយដែលបានជួយបង្កើតភាពរឹងមាំ និងជំរុញឱ្យនាងខិតខំអភិវឌ្ឍខ្លួន រហូតអាចឈានមកដល់ឆាកប្រកួតសម្រស់ និងទទួលបានមកុដ Miss Cosmo Cambodia។

ការចែករំលែករឿងរ៉ាវផ្ទាល់ខ្លួនរបស់កញ្ញា ផន ស្រីពី ក៏បានបង្ហាញពីដំណើរដ៏វែងឆ្ងាយមួយ ពីក្មេងស្រីដែលធ្លាប់ត្រូវបានមើលងាយ មកកាន់នារីដែលអាចឈរលើឆាក និងកាន់តំណែងជាម្ចាស់មកុដ។ សម្រាប់នាង ការលំបាកក្នុងអតីតកាល មិនមែនជាឧបសគ្គដែលត្រូវឱ្យខ្លួនចុះចាញ់នោះទេ ប៉ុន្តែជាកម្លាំងជំរុញឱ្យនាងបន្តដើរទៅមុខ និងបង្ហាញពីសមត្ថភាពរបស់ខ្លួន។