នគរបាលខេត្តស្វាយរៀង បន្តចុះបង្ក្រាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចផ្ទះជួលចំនួន ០៤ទីតាំងនិងមនុស្ស បាន៣៨នាក់ក្នុងក្រុងបាវិត

National • August 03, 2026

ស្វាយរៀង៖ដោយអនុវត្តតាមបទបញ្ជាដ៏ខ្ពង់ខ្ពស់របស់ ឯ.ឧ នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្ដម ប៉េង ពោធិ៍សា អភិបាលនៃគណៈអភិបាល ខេត្តស្វាយរៀង ស្តីពីការអនុវត្តយុទ្ធនាការបង្ក្រាបបទល្មើសឆបោកតាមប្រព័ន្ធបច្ចេកវិទ្យា នៅទូទាំងខេត្តស្វាយរៀងនិងការដឹកនាំបញ្ជាផ្ទាល់ពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង នៅថ្ងៃទី៣១ ខែកក្កដា ឆ្នាំ២០២៦ លោកវរៈសេនីយ៍ឯក គឹម ឡៃ ស្នងការរងនគរបាលខេត្ត បានដឹកនាំកម្លាំងនគរបាលជំនាញ សហការជាមួយកម្លាំងស្ថាប័នពាក់ព័ន្ធ បានបន្តចុះធ្វើការស្រាវជ្រាវ បង្រ្កាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចផ្ទះជួល ចំនួន០៤ទីតាំង ស្ថិតនៅភូមិបាវិតកណ្តាល និង ភូមិបាវិតលើ សង្កាត់បាវិត ក្រុង បាវិត ខេត្តស្វាយរៀង។

យោងតាមសមត្ថកិច្ចក្នុងការចុះស្រាវជ្រាវនិងបង្ក្រាបទីតាំងផ្ទះជួលទាំង៤ទីតាំងខាងលើនោះ កំលាំងសមត្ថកិច្ច បានឃាត់ខ្លួនមនុស្សក្នុងរង្វង់ប្រតិបត្តិការចំនួន៣៨នាក់ ស្រី០៧នាក់ ព្រមទាំងបានចាប់យកសម្ភារៈពាក់ព័ន្ធនិងបទល្មើស រួមមាន៖កំព្យូទ័រលើតុ All-In-One, កុំព្យូទ័រយួរដៃ ,ទូរស័ព្ទដៃ និងសម្ភារៈប្រើប្រាស់មួយចំនួនទៀត។

ហើយបច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញកំពុងកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធីច្បាប់ រីឯទីតាំងប្រព្រឹត្តិបទល្មើសក្រុម ការងារបានបិទទីតាំងបណ្ដោះអាសន្ន(Seal Off)៕