រថយន្ត SANG YONG ព្រលះអេស្កាវ៉ាទរ័ ដែលខូចចតលើទ្រូងផ្លូវបុកត្រូវទាំងជាង កំពុងជួសជុល បណ្តាលឲ្យរងរបួសធ្ងន់ស្រាលមនុស្សប្រុសស្រី០៣នាក់

កណ្តាល៖ជនរងគ្រោះរបួសធ្ងន់ស្រាលប្រុសស្រីចំនួន០៣នាក់ ត្រូវបានបញ្ជូនតាមរថយន្តសាមុយទៅមន្ទីរពេទ្យ ក្រោយជួបហេតុការណ៍គ្រោះថ្នាក់ចរាចរណ៍ បង្កឡើងដោយរថយន្ត SANG YONG ជ្រុលទៅបុកគ្រឿងចក្រអេស្កាវ៉ាទរ័ ដែលខូចចតលើទ្រូងផ្លូវ បុកត្រូវ ទាំងជាងម្នាក់ កំពុងជួសជុល បណ្តាលឲ្យរងរបួសធ្ងន់ស្រាលមនុស្សប្រុសស្រីចំនួន០៣នាក់ បញ្ជូនទៅសង្គ្រោះនៅមន្ទីរពេទ្យ ដោយកើតហេតុកាលពីវេលាម៉ោង១៣និង៤៥នាទី ថ្ងៃទី១៩ ខែសីហា ឆ្នាំ២០២៦ នៅចំណុចលើកំណាត់ផ្លូវជាតិលេខ 5 ចន្លោះ គីឡូម៉ែត្រលេខ 24-25 ស្ថិតក្នុងភូមិព្រែកក្តី ឃុំព្រែកតាទែន ស្រុកពញាឮ ខេត្តកណ្តាល ។

លោកវរៈសេនីយ៍ឯក ដួង តេង អធិការនគរបាលស្រុកពញាឮ បានប្រាប់ឲ្យដឹងថានៅវេលាកើតហេតុ មានរថយន្ដមួយគ្រឿងម៉ាក​SANG YONG ពណ៌ស​ ពាក់ស្លាកលេខភ្នំពេញ 2F-9345 មានអ្នករួមដំណើរចំនួន០២នាក់ បើកបរទិសពីត្បូង​ ទៅជើង។

លុះមកដល់ចំណុចកើតហេតុ​ ក៏បានជ្រុលទៅបុកចំ អេស្កាវ៉ាទ័រ(មិនស្គាល់ម៉ាក) ពណ៌លឿង ដែលខូចចតនៅលើទ្រូងផ្លូវ មានទិសដៅពីត្បូង​ទៅជើង​ បណ្ដាលអោយប៉ះត្រូវជាងម្នាក់ដែលកំពុងអង្គុយជួសជុលអេស្កាវ៉ាទ័រ ឈ្មោះហាស់​ សាមាន​ ភេទប្រុស​  អាយុ៤៤ឆ្នាំ​ មានទីលំនៅក្នុងភូមិអណ្ដូងច្រុះ​ សង្កាត់ត្រចតទង​ ក្រុងឧដុង្គម៉ែជ័យ​ ខេត្ដកំពង់ស្ពឺ (រងរបួសធ្ងន់)។

ក្រោយកើតហេតុ សមត្ថកិច្ចជំនាញស្រុក បានចុះអន្តរាគមន៍បញ្ជូនជនរងគ្រោះតាមរថយន្តសង្រ្គោះបន្ទាន់ទៅមន្ទីរពេទ្យ ។ ចំណែកវត្ថុតាង រថយន្ត រងការខូចខាតធ្ងន់ និង

អេស្កាវ៉ាទរ័ រងការខូចខាតស្រាល ត្រូវសមត្ថកិច្ចយកមករក្សាទុកជាបណ្តោះអាសន្ន នៅ​អធិការ​ដ្ឋាន​នគរបាល​ស្រុកពញាឮ ដើម្បីបន្ដនីតិវិធី ៕ ដោយ​៖ប៉ែន​ឆន