រថយន្តម៉ាកToyota Prius បើកលឿនរ៉េចង្កូតជ្រុលទៅបុកម៉ូតូ HONG DA SCOOPY ចតចោលនៅមុខផ្ទះ រងការខូចខាតស្ទើរទាំងស្រុង

ភ្នំពេញ៖ បុរសម្នាក់ បានបើករថយន្តម៉ាកToyota Prius មួយគ្រឿងបើកក្នុងល្បឿនលឿន ក៏រ៉េចង្កូតជ្រុលទៅបុកម៉ូតូ HONGDA SCOOPY ចតចោលនៅខាងមុខផ្ទះ

បណ្តាលឲ្យរងការខូចខាត យ៉ាងដំណំ។

ហេតុការណ៍គ្រោះថ្នាក់ចរាចរណ៍ខាងលើនេះដែរ បានកើតឡើងកាលពីវេលាម៉ោង១០:៣០នាទីយប់ថ្ងៃទី២៤ ខែសីហា ឆ្នាំ២០២៦ ស្ថិតនៅលើផ្លូវបេតុងក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។

ប្រភពពីកន្លែងកើតហេតុ បានអោយដឹងថានៅមុនពេលកើតហេតុ គេឃើញបុរសម្នាក់បានបើករថយន្តមួយគ្រឿងម៉ាក Toyota Prius ពណ៌ទឹកប្រាក់ពាក់ស្លាកលេខ ភ្នំពេញ 2BH-3650 ធ្វើដំណើរតាមបណ្តោយផ្លូវបេតុងទិសដៅពីជើងទៅត្បូងក្នុងល្បឿនលឿន។

លុះពេលបើកមកដល់ចំណុចកើតហេតុខាងលើ ស្រាប់តែរ៉េចង្កូតជ្រុលទៅបុកម៉ូតូម៉ាកHONG DA SCOOPY ពណ៌ស ពាក់ស្លាកលេខ ភ្នំពេញ 1ME-2755 ដែលចតចោលនៅខាងមុខផ្ទះ បណ្តាលឲ្យរងការខូចខាតយ៉ាងដំណំ សំណាងល្អ មិនបង្កអោយមានគ្រោះថ្នាក់ ដល់មនុស្ស។

ក្រោយកើតហេតុ ភាគីម្ចាស់រថយន្ត បានសងសំណងទៅលើម៉ូតូបចំនួន៣៥០០ដុល្លារ ដើម្បីបញ្ចប់រឿងនៅកន្លែងកើតហេតុ៕ ដោយ​៖សាមេត