រថយន្តម៉ាកToyota Prius បើកលឿនមិនប្រយ័ត្នជ្រុលទៅបុកក្បាលនាគពុះចែកទ្រូងផ្លូវ ឡើងកល់ជាប់លើរបាំងថ្ម រងការខូចខាតយ៉ាងដំណំ

ភ្នំពេញ៖ បុរសម្នាក់ បានបើករថយន្តម៉ាកToyota Prius មួយគ្រឿងក្នុងល្បឿនលឿនខ្វះ ការប្រុងប្រយ័ត្ន ក៏រ៉េចង្កូតជ្រុលទៅបុកក្បាលនាគពុះចែកផ្លូវ ធ្វើឲ្យរថយន្តឡើងកល់ជាប់លើរបាំងថ្មទៅមុខលែងរួច រងការខូចខាតយ៉ាងដំណំ។

ហេតុការណ៍គ្រោះថ្នាក់ចរាចណ៍ខាងលើនេះដែរ បានកើតឡើងកាលពីវេលាម៉ោង ១១ និង៥០នាទីយប់ថ្ងៃទី០៤ ខែសីហាឆ្នាំ ២០២៦ ស្ថិតនៅតាមបណ្តោយផ្លូវ២៧១ ចំណុច ក្បែរនិងច្រកចូលវត្តដំបូងខ្ពស់ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីវិញ ។

បើតាមការបញ្ជាក់ពីកន្លែងកើតហេតុ បានឲ្យដឹងថានៅមុនពេលកើតហេតុ គេឃើញរថយន្តបង្កម៉ាកToyota Prius ពណ៌ខ្មៅមួយគ្រឿងពាក់ស្លាកលេខភ្នំពេញ- 2BS-8337 បើកបរ ដោយបុរសម្នាក់ធ្វើដំណើរតាមបណ្ដោយផ្លូវ២៧១ទិសដៅពីលិចទៅកើតក្នុងល្បឿនលឿន។

លុះពេលបើកមិដល់ចំណុចកើតហេតុខាងលើ ក៏បានរ៉េចង្កូតជ្រុលទៅបុកក្បាលនាគពុះចែកទ្រូងផ្លូវ ធ្វើឲ្យរថយន្តឡើងកល់ជាប់លើរបាំងថ្មទៅមុខលេងរួច ខូចខាតយ៉ាងដំណំ សំណាងល្អ មិនបង្កឲ្យគ្រោះថ្នាក់ទៅដល់មនុស្ស ហើយ ភ្លាមនោះដែរ អ្នកបើកបរបានគេចចេញពីកន្លែងកើតហេតុបាត់ស្រមោល។

ក្រោយកើតហេតុ សមត្ថកិច្ចមូលដ្ឋានសហការជាមួយមន្ត្រីជំនាញចរាចរណ៍ចុះមកវាស់វែងស្ទូចយករថយន្តបង្ក ទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញជាបណ្ដោះអាសន្នរងចាំការដោះស្រាយគ្នានៅពេលក្រោយ៕ ដោយ ៖សាមេត