រកឃើញម្តាយទារកដែលគេយកទៅចោលក្នុងធុងសំរាមទាំងភ្លៀង
ភ្នំពេញ៖ស្ត្រីជាម្តាយទារកដែលគេយកទៅបោះចោលនៅក្នុងធុងសំរាមទាំងភ្លៀង
ត្រូវបានសមត្ថកិច្ចស្រាវជ្រាវរកឃើញហើយ និងកំពុងនាំខ្លួនទៅស្នងការដ្ឋាននគរបាលរាជធានីភ្នំពេញដើម្បីសាកសួរ។
បន្ទាប់ពីសាកសួរ ស្ត្រីរូបនោះបានអះអាងថា ស្មានតែកូនស្លាប់ទើបយកកូនទៅបោះចោល។ ស្ត្រីជាម្ដាយចិត្តអប្រិយរូប
នោះឈ្មោះ ម៉ោក ចាន់រី ភេទស្រី អាយុ១៩ឆ្នាំ ជនជាតិខ្មែរ ។
លោឧត្តមសេនីយ៍ឯក ជួនណារិន្ទ អគ្គស្នងការរងនគរបាលជាតិនិងជាស្នងការនគរបាលរាជធានីភ្នំពេញ
បានឲ្យដឹងថានៅវេលាម៉ោង១០.០០នាទីព្រឹក នាថ្ងៃទី១៣ ខែកញ្ញា ឆ្នាំ២០២៦ លោកស្រីឧត្តមសេនីយ៍ត្រី ឆេង សារ៉ត ស្នងការរង បានដឹកនាំកំលាំងការិយាល័យប្រឆាំងការជួញដូរ
និង មន្ត្រីនគរបាលប៉ុស្តិ៍ចតុមុខ បានស្រាវជ្រាវរកឃើញស្ត្រីជាម្ដាយទារកនោះហើយ
(កំពុងនាំគាត់មកស្នងការដ្ឋាននគរបាលរាជធានី សាកសួរគាត់អំពីមូលហេតុ)។ លោកស្នងការ ក៏បានថ្លៃអំណរគុណដល់មន្ត្រីនគរបាលមូលដ្ឋាន
បានយកចិត្តទុកដាក់ក្នុងការស្រាវជ្រាវលឿន ផងដែរ។
តាមស្ត្រីជាម្ដាយ បានឲ្យសមត្ថកិច្ចដឹងថា
មូលហេតុដែលខ្លួនយកកូនទៅបោះចោលដោយនឹកស្មានថាកូនស្លាប់បាត់បង់ជីវិត បន្ទាប់ពីសម្រាល។
ស្ត្រីជាម្តាយបានឲ្យដឹងថាកាលពីថ្ងៃទី១១
ខែកញ្ញា ឆ្នាំ២០២៦ខ្លួន បានចេញពីការដ្ឋានសំណង់ម្តុំផ្សារសីលឹប សង្កាត់ចតុមុខ
ជាមួយបងស្រីបង្កើតឈ្មោះ ស្រីណុច ក៏បាននាំគ្នាទៅដើរលេងនៅកោះនរា។ ពេលកំពុងដើរដល់ចំណុចកន្លែងស្ទួចត្រី
កោះនរា មានអាការៈឈឺពោះ ដោយឃើញអាការៈមិនស្រួល ក៏ត្រឡប់មកកន្លែងស្នាក់នៅ ក្នុងការដ្ឋានសំណង់វិញ
។ លុះក្រោយមក ក៍បានឈឺពោះឆ្លងទន្លេសម្រាលដោយខ្លួនឯង នៅក្នុងការដ្ឋានសំណង់នោះ ដោយពុំមានពេទ្យ
នោះទេ មានតែបងស្រីឈ្មោះ ស្រីណុច ជាអ្នកនៅក្បែរ ។
តាមព័ត៌មានបានឲ្យដឹងទៀតថាបន្ទាប់ពីសម្រាលកូនរួច
ទារកទន់ពុំមានសម្លេងយំ,កំរើកអ្វីទាំងអស់។ ស្ត្រីជាម្ដាយ និងបងស្រី គិតថាទារកខាងលើស្លាប់ហើយ
ទើបយកមកបោះចោលក្នុងធុងសម្រាម
មុខការដ្ឋានសំណង់ រួចក៏ចូលទៅសម្រាកវិញធម្មតា ។
គួរបញ្ជាក់ថាកាលពីយប់រំលងអាធ្រាត្រឈានចូលថ្ងៃទី១២ ខែកញ្ញា ឆ្នាំ២០២៦ អ្នករើសអេតចាយម្នាក់
បានប្រទះឃើញទារកនៅក្នុងធុងសំរាមនៅចំណុចផ្លូវ២៤២ ភូមិ៧ សង្កាត់ចតុមុខ ខណ្ឌដូនពេញ
រាជធានីភ្នំពេញ ហើយ ត្រូវបានប្រជាពលរដ្ឋជាម្ចាស់ហាងផ្កា
ស្នើសុំខាងមន្ទីរសង្គមកិច្ចរាជធានីភ្នំពេញ និង ចៅសង្កាត់ យកទៅមើលថែជា បណ្តោះអាសន្ន
។
បន្ទាប់ពីភ្ញាក់ផ្អើលប្រទះឃើញទារកគេយកទៅបោះចោលនៅក្នុងធុងសំរាមបែបនេះ
ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង
និងជាស្នងការនគរបាលរាជធានីភ្នំពេញ បានបញ្ជាឱ្យជំនាញស្រាវជ្រាវ។
នៅព្រឹកថ្ងៃទី១៣ ខែកញ្ញា ឆ្នាំ២០២៦ លោកស្រីឧត្តមសេនីយ៍ត្រី ឆេង សារ៉េត
ស្នងការរងទទួលការងារយេនឌ័រ ,លោកអធិការរងទទួលការងារព្រហ្មទណ្ឌ,
លោកនាយប៉ុស្តិ៍នគរបាលរដ្ឋបាលចតុមុខ ក៏បានធ្វើការស្រាវជ្រាវហើយ
ឈានទៅរកឃើញស្ត្រីជាម្ដាយនិងឪពុក រួចនាំខ្លួនទៅការិយាល័យប្រឆាំងការជួញដូរមនុស្ស
និងការពារអនីតិជន នៃស្នងការដ្ឋាននគរបាលរាជធានី ដើម្បីចំណាត់ការបន្ត ៕ម៉េង ធា
