បុរសម្នាក់ ជិះម៉ូតូលឿនបត់ឆ្លងផ្លូវជ្រុលទៅបុករថយន្តធ្វើដំណើរមកត្រង់ បណ្តាលឲ្យដួល បោកក្បាលស្លាប់ភ្លាមៗ

ភ្នំពេញ៖បុរសម្នាក់ បានស្លាប់នៅនិងកន្លែងកើតហេតុយ៉ាងអាណោចអាធ័ម ក្រោយពេលជិះម៉ូតូលឿនបត់ឆ្លងផ្លូវមិនប្រយ័ត្នជ្រុលទៅបុកចំពីមុខចំហៀងខាងឆ្វេងរថយន្តម៉ាក MG ដែលធ្វើដំណើរមកត្រង់ យ៉ាងពេញទំហឹង។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង ១០:១៥នាទីយប់ ត្រូវនិងថ្ងៃទី១៤ ខែកញ្ញា ឆ្នាំ២០២៦ ស្ថិតនៅតាមបណ្ដោយផ្លូវលេខ ៥៩៨ ក្នុងសង្កាត់ គីឡូម៉ែត្រលេខ៦ ខណ្ឌ ឬស្សីកែវ រាជធានីភ្នំពេញ ។

ប្រភពពីកន្លែងកើតហេតុ បានឲ្យដឹងថានៅមុនពេលកើតហេតុ គេឃើញបុរសម្នាក់ បាន បើករថយន្តម៉ាក MG ពណ៌ស មួយគ្រឿងពាក់ផ្លាកលេខភ្នំពេញ 2BT-4828 ធ្វើដំណើរ តាមម្ដាយផ្លូវលេខ 598 ទិសដៅពីត្បូងទៅជើង។

លុះពេលបើកមកដល់ត្រង់ចំណុចកើតហេតុផ្លូវបំបែកជាបួន ស្រាប់តែគេឃើញមានម៉ូតូមួយគ្រឿងទៀត ម៉ាកSUZUKI LET’S ពាក់ផ្លាកលេខភ្នំពេញ 1HX-5322 ជិះដោយបុរសរងគ្រោះម្នាក់ធ្វើដំណើរទិសដៅបញ្ច្រាសគ្នាពីជើងទៅត្បូងក្នុងល្បឿនលឿន រួចក៏បានបត់ឆ្វេងឆ្ពោះទៅផ្លូវបេតុងមួយខ្សែ ក៏ជ្រុលទៅបុកចំពីមុខរថយន្តចំហៀងខាងឆ្វេង   បណ្តាលឲ្យជនរងគ្រោះជាម្ចាស់ម៉ូតូ ស្លាប់ភ្លាមៗ។ ចំណែកម្ចាស់រថយន្ត ត្រូវសមត្ថកិច្ចឃាត់ខ្លួន។

ក្រោយកើតហេតុខាងលើ សមត្ថកិច្ចមូលដ្ឋានសហការជាមួយមន្ត្រីជំនាញចរាចរណ៍ចុះមកវាស់វែងស្ទូចយករថយន្តនិងម៉ូតូទៅរក្សាទុកនៅការិយាល័យចរាចរណ៍ជំនាញផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំការដោះស្រាយនៅពេលក្រោយ។  ចំណែកសព សមត្ថកិច្ចធ្វើកំណត់ហេតុ ប្រគល់ឲ្យទៅក្រុមគ្រួសារយកទៅធ្វើបុណ្យតាម ប្រពៃណី៕ ដោយ​៖សាមេត​