អ្នកដឹកជញ្ជូនម្នាក់ជិះម៉ូតូទាក់ដៃចង្កូត ដួល ត្រូវរថយន្តមន្ទីរសាធារណការមកពីក្រោយ កិនបែកក្បាលស្លាប់តាមផ្លូវ៦០ម៉ែត្រ

ភ្នំពេញ៖ បុរសម្នាក់ជាបុគ្គលិកក្រុមហ៊ុនដឹកជញ្ជូន WOW NOW ម្នាក់ ត្រូវរថយន្តរបស់ មន្ទីរសាធារណៈការរាជធានីភ្នំពេញ កិនបែកក្បាលស្លាប់នៅហ្នឹងកន្លែង ខណៈពេលដែលជិះម៉ូតូទាក់ដៃចង្កូតគ្នាដួល ហើយ រថយន្តនោះ មកពីក្រោយ។

   ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង ២និង១០នាទីរសៀលថ្ងៃទី១៨ ខែកញ្ញា ឆ្នាំ២០២៦ តាមបណ្តោយផ្លូវ ៦០ម៉ែត្រមុខផ្សារទំនើបអ៊ីអន៣ ស្ថិតក្នុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។ ជនរងគ្រោះត្រូវបានគេស្គាល់ អត្តសញ្ញាណឈ្មោះ អុម ថុនសិដ្ឋ អាយុ ២៥ឆ្នាំ មានមុខរបរ ជាបុគ្គលិកដឹកជញ្ជូន (Delivery) ឱ្យក្រុមហ៊ុន WOW NOW ។

 តាមប្រភពព័ត៌មាន បានឲ្យដឹងថា មុនកើតហេតុ ជនរងគ្រោះបើកបរម៉ូតូមួយគ្រឿងក្នុង ទិសដៅពីជើងទៅត្បូង តាមបណ្តោយផ្លូវ ៦០ម៉ែត្រ ។ លុះមកដល់ចំណុចគ្រោះថ្នាក់ ម៉ូតូរបស់ជនរងគ្រោះ បានទាក់ដៃចង្កូតជាមួយម៉ូតូមួយគ្រឿងទៀត (មិនស្គាល់ម៉ាក និងស្លាកលេខ) បណ្តាលឱ្យដួលទៅលើទ្រូងផ្លូវ ។ ស្របពេលនោះ មានរថយន្តបែនដឹកដី មួយគ្រឿង បើកបរស្របទិសគ្នាមកពីខាងក្រោយ បានកិនចំក្បាលជនរងគ្រោះ បណ្តាលឱ្យស្លាប់បាត់បង់ជីវិតភ្លាមៗតែម្តង  ៕ ម៉េង ធា