រថយន្តមិនស្គាល់ម៉ាក បើកលឿនទៅបុកម៉ូតូពីក្រោយ បណ្ដាលឲ្យបុរសម្នាក់ស្លាប់យ៉ាង អាណោចអាធ័ម

ភ្នំពេញ៖បុរសម្នាក់ បានស្លាប់បាត់បង់ជីវិតយ៉ាងអាណោចអាធ័ម ក្រោយពេលបើកម៉ូតូដឹកប្រហិតត្រីយកទៅឲ្យម៉ូយនៅខាងព្រែកព្នៅ ក៏ត្រូវបានរថយន្តមួយគ្រឿងមិនស្គាល់ម៉ាក បើកលឿនមកបុកពីក្រោយម៉ូតូ ប៉ើងជនរងគ្រោះទៅបោកនិងបង្គោលភ្លើង។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង1:30នាទីរំលងអាធ្រាតឈានចូលថ្ងៃទី29 ខែកញ្ញា ឆ្នាំ2026 ស្ថិតនៅតាមបណ្ដោយផ្លូវជាតិលេខ 5 សង្កាត់ឬស្សីកែវ ខណ្ឌឫស្សីកែវ រាជធានីភ្នំពេញ។

តាមការបញ្ជាក់ពីកន្លែងកើតហេតុ បានឲ្យដឹងថាមុនពេលកើតហេតុ គេឃើញបុរសរង គ្រោះជិះម៉ូតូមួយគ្រឿងម៉ាក PG-1 ពាក់ស្លាកលេខភ្នំពេញ 1LF-3781 ធ្វើដំណើរតាម  បណ្ដោយផ្លូវជាតិលេខ5 ទិសដៅពីត្បូងទៅជើង គោលបំណងដឹកប្រហិតត្រីចេញពីភ្នំពេញ ម្តុំចតុមុខឆ្ពោះទៅខាងផ្សារព្រែកព្នៅ ។

លុះពេលជិះមកដល់ចំណុចកើតហេតុ ស្រាប់តែគេឃើញមានរថយន្តមិនស្គាល់ម៉ាកមួយ គ្រឿង ពណ៌ខ្មៅមិនចាំស្លាកលេខ ធ្វើដំណើរមកពីក្រោយស្របទិសគ្នាពីត្បូងទៅជើងក្នុង ល្បឿនលឿនក៏ជ្រុលទៅបុកពីក្រោយម៉ូតូពេញទំហឹងប៉ើង ទៅបោកផ្ទប់បង្គោលភ្លើង ស្លាប់យ៉ាងអាណោចអាធ័ម ចំណែករថយន្តបង្ក បន្តល្បឿនបើកគេចខ្លួនបាត់ស្រមោល។

បន្ទាប់ពីកើតហេតុ សមត្ថកិច្ចមូលដ្ឋាននិងមន្ត្រីជំនាញចរាចរណ៍ ចុះមកដល់វាស់វែងយកម៉ូតូជនរងគ្រោះទៅរក្សាទុកនៅអធិការដ្ឋាននគរបាលខណ្ឌឬស្សីកែវជាបណ្ដោះអាសន្ន ។

ចំណែកឯសព សមត្ថកិច្ចធ្វើកំណត់ហេតុ ប្រគល់ឲ្យទៅក្រុមគ្រួសារយកទៅបុណ្យតាមប្រពៃណី។ រីឯរថយន្តបង្ក សមត្ថកិច្ចជំនាញ នឹងធ្វើការតាមស្រាវជ្រាវដើម្បីឃាត់យកមកចាត់ការតាមនីតិវិធីច្បាប់៕ ដោយ​៖សាមេត