ប្រហេសតែបន្តិចបាត់បង់បង់ចៅប្រុសជាទីស្រលាញ់ ដោយធ្លាក់ពីលើខ្នងប្រលាយរមៀលចូលក្នុងទឹកលង់ស្លាប់

     កណ្តាល៖ ជីដូនយុំខ្សោះស្ទើអស់ទឹកភ្នែកដោយធ្វេសតែបន្តិច បណ្តាលឲ្យចៅប្រុសសំណប់ បានធ្លាក់ពីលើខ្នងប្រលាយ រមៀលចូលក្នុងទឹកលង់ស្លាប់  ដោយកើតហេតុកាលពីវេលាម៉ោង០៩និង៣០នាទី​ ថ្ងៃទី០៨ ខែកញ្ញា ឆ្នាំ២០២៦នៅចំណុចប្រលាយ (D) ស្ថិតក្នុងភូមិស្វាយដំណាក់ ឃុំក្រាំងយ៉ូវ ស្រុកស្អាង ខេត្តកណ្តាល។​ 

​​​​     លោកវរៈសេនិយ៍ឯក រស់ ចន្ថា អធិការនគរបាលស្រុកស្អាង បានប្រាប់ឲ្យដឹងថា៖ កុមារារងគ្រោះ‌មានឈ្មោះ ប៊ុន ហេងហ៊ុយ អាយុ០៤ឆ្នាំ ជាសិស្សសាលាមត្តេយ្យ មានឪពុកឈ្មោះ វណ្ណា ប៊ុនហេង និងម្ដាយឈ្មោះ ស៊ីម ស្រីណាង​ ជនជាតិខ្មែរមុខរបរកសិករ និងមានទីលំក្នុងភូមិឃុំកើតហេតុ។ តាមការបំភ្លឺរបស់ឈ្មោះ ជា សារ៉ន  ភេទស្រីអាយុ៥៤ឆ្នាំ ត្រូវជាលោកយាយបង្កើតរបស់កុមាររងគ្រោះ បានរៀបរាប់ប្រាប់សមត្ថកិច្ចថា៖ មុនកើតហេតុ លោកយាយ បាននាំចៅប្រុសចំនួន០២នាក់ ដែលម្នាក់ជាកុមាររងគ្រោះនិងម្នាក់ទៀតឈ្មោះ ប៊ុនហេង ម៉ាប់ អាយុ០៥ឆ្នាំ(ជាបងប្រុស)ទៅស្រែជាមួយ។

ពេលទៅដល់កន្លែងកើតហេតុ លោកយាយ បានទុកចៅប្រុសទាំង០២នាក់នៅលើខ្នងប្រលាយកន្លែងទុកម៉ូតូ  រួចលោកយាយ បានចុះទៅដកស្មៅស្រូវនៅក្នុងស្រែ។ បន្តិចក្រោយមក លោកយាយក៏បានងាករកចៅ ស្រាប់តែឃើញតែចៅម៉ាប់ម្នាក់ ហើយបាត់ចៅ ហ៊ុយ (ចៅដែលរងគ្រោះ)មិនឃើញ។ ពេលនោះ លោកយាយក៏បានរត់មកកន្លែងទុកម៉ូតូវិញ និងសួរចៅឈ្មោះម៉ាប់ ថា៖ឃើញចៅហ៊ុយទេ? ឯចៅឈ្មោះម៉ាប់ ក៏បានឆ្លើយថា៖  អាហ៊ុយ!វា រមៀលធ្លាក់ចូលទឹកប្រលាយបាត់ហើយយាយ!!។  ពេលនោះលោកយាយ ក៏បានចុះទៅរាវរកកុមាររងគ្រោះតែរកមិនឃើញ​ ក៏បានស្រែកហៅប្រជាពលរដ្ឋដែលនៅជិតៗទីនោះឲ្យមកជួយរាវរកឃើញស្រង់កុមាររងគ្រោះឡើងមកលើគោក ជួយធ្វើចលនាសង្គ្រោះបឋម ប៉ុន្តែកុមាររងគ្រោះបានលង់ទឹកស្លាប់បាត់ទៅហើយ បន្ទាប់ក៏បានរាយការណ៍ប្រាប់សមត្ថកិច្ចមូលដ្ឋាន។

     លោកអធិការបានបញ្ជាក់ថា៖ ក្រោយសមត្ថកិច្ចផ្នែកយុត្តិធម័ ជំនាញពិនិត្យទីតាំងកើតហេតុ ធ្វើកោសលវិច្ច័យ រួមជាមួយអាជ្ញាធរ និងយោងលោកគ្រូពេទ្យ រកពុំឃើញអ្វីគួរឲ្យកត់សំគាល់ ក៏បានដាក់សេចក្តីសន្និដ្ធានថា៖កុមាររងគ្រោះគឺពិតជាស្លាប់ដោយលង់ទឹកប្រាកដមែន និងក៏បានប្រគល់សព ជូនក្រុមគ្រួសាររៀបចំធ្វើពិធីបុណ្យតាមប្រពៃណី ៕ ដោយ៖ប៉ែន ឆន