មន្ត្រីឧទ្យានុរក្ស បន្តចុះបង្រ្កាបនិងរុះរើសំណង់រោងឈើប្រក់តង់ខុសច្បាប់ ចំនួន៣០កន្លែង នៅក្នុងឧទ្យានជាតិគីរីរម្យ

កំពង់ស្ពឺ៖ មន្រ្តីឧទ្យានុរក្សនៃមន្ទីរបរិស្ថានខេត្តកំពង់ស្ពឺ កាលពីថ្ងៃទី១២ ខែកញ្ញា ឆ្នាំ២០២៦ បានបន្តចុះបង្ក្រាប ការរុករាន ទន្ទ្រានដីរបស់រដ្ឋ សង់រោង បំណងយកដីធ្វើជាកម្មសិទ្ធដោយគ្មានការអនុញ្ញាត ក្នុងឧទ្យានជាតិព្រះសុរាម្រិត-កុសុមៈ «គិរីរម្យ» ស្ថិតក្នុងឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។

 មន្ត្រីឧទ្យានុរក្ស បានចាត់វិធានការច្បាប់ ដោយធ្វើការរុះរើ រោងឈើធ្វើពីកូនឈើមូល ប្រក់កៅស៊ូតង់ ទំហំ ២ម៉ែត្រ គុណនិង៣ម៉ែត្រ ចំនួន៣០កន្លែង ប្រព្រឹត្តដោយ អញ្ញាតជន នៅក្នុងតំបន់ការពារធម្មជាតិ។ ជាមួយគ្នានេះ ក្រុមការងារ កំពុងបន្តស្រាវជ្រាវ រកអ្នកប្រព្រឹត្តបទល្មើស ដើម្បីចាត់ការតាមនីតិវិធីច្បាប់ ស្របតាមក្រមបរិស្ថាន និងធនធានធម្មជាតិ។

សូមបញ្ជាក់ផងដែរថាក្នុងអំឡុងខែសីហា- ខែកញ្ញា ឆ្នាំ២០២៦ មន្រ្តីឧទ្យានុរក្ស បានចុះបង្កាបបទល្មើសធនធានធម្មជាតិក្នុងឧទ្យានជាតិគីរីរម្យ បានចំនួន២៦ករណី រួមមាន៖

ទី១-ការបង្គោលហ៊ុំព័ទ្ធរបង បន្លសួស ក្នុងគោលបំណងកាន់កាប់ ដើម្បីយកដីធ្វើជាកម្មសិទ្ធិ ដកហូតផ្ទៃដីទំហំប្រមាណ ៨.៨៨ហិកតា ចំនួន ១៨ករណី

ទី២-កាប់គាស់ រុករានដីព្រៃ ឆ្ការ ដុត ដើម្បីយកដីធ្វើជាកម្មសិទ្ធ ដកហូតផ្ទៃដីទំហំប្រមាណ ២.៥០ហិកតា ចំនួន ៤ករណី

ទី៣-ចាប់ដោយដាក់អន្ទាក់សត្វព្រៃ ដកហូតអន្ទាក់ ចំនួន១៥ខ្សែ (សត្វស្វាងាប់ ចំនួន១ក្បាល ជាប់អន្ទាក់)  ចំនួន ១ករណី

ទី៤-កាប់រំលំព្រៃឈើ និងដកហូតឈើប្រភេទលេខ២(ស្រល់) ៦ដើម ចំនួន ២ករណី

និងទី៥-ការរុករាន ទន្ទ្រានដី សង់រោង យកដីធ្វើជាកម្មសិទ្ធដោយគ្មានការអនុញ្ញាតចំនួន១ករណីផងដែរ៕ប៊ុនធឿន