BTS’s Jungkook បរិច្ចាគ ១ ពាន់លានវ៉ុន ជួយកុមារមកពីគ្រួសារក្រីក្រ នៅមន្ទីរពេទ្យកុមារក្រុងសេអ៊ូល
សកម្មភាពមនុស្សធម៌របស់តារាចម្រៀងកូរ៉េខាងត្បូង
និងសមាជិកក្រុម BTS Jungkook កំពុងទទួលបានការចាប់អារម្មណ៍ជាថ្មី ខណៈតារាចម្រៀងរូបនេះ
ត្រូវបានរាយការណ៍ថា បានបរិច្ចាគប្រាក់ចំនួន ១ ពាន់លានវ៉ុន ឬប្រមាណ ៧៤៥,៦០០ ដុល្លារអាមេរិក ទៅកាន់មន្ទីរពេទ្យកុមារ Seoul National
University Children’s Hospital ដើម្បីចូលរួមជួយដល់កុមារដែលកំពុងត្រូវការការព្យាបាល។
ថវិកាដ៏ច្រើននេះ
នឹងចូលរួមចំណែកក្នុងគម្រោងមើលថែរបស់មន្ទីរពេទ្យ ហើយត្រូវបានរំពឹងថា
នឹងផ្តល់ជំនួយជាពិសេសដល់អ្នកជំងឺកុមារ ដែលមកពីគ្រួសារដែលមានជីវភាពខ្វះខាត
ដើម្បីឱ្យពួកគេអាចទទួលបានការព្យាបាលដែលចាំបាច់
ដោយកាត់បន្ថយបន្ទុកផ្នែកហិរញ្ញវត្ថុរបស់គ្រួសារ។
អ្វីដែលកាន់តែមានអត្ថន័យ
គឺនេះមិនមែនជាលើកទីមួយឡើយដែល Jungkook បានបរិច្ចាគថវិកាទៅកាន់មន្ទីរពេទ្យកុមារមួយនេះ។
កាលពីខែមេសា ឆ្នាំ២០២៣ Jungkook ក៏ធ្លាប់បានបរិច្ចាគប្រាក់ចំនួន ១
ពាន់លានវ៉ុន ទៅកាន់ Seoul National University Children’s Hospital ដោយមានគោលបំណងជួយអ្នកជំងឺកុមារដែលមកពីគ្រួសារដែលមានជីវភាពខ្វះខាត
ឱ្យអាចទទួលបានការព្យាបាលដោយមិនត្រូវប្រឈមនឹងបន្ទុកថ្លៃព្យាបាលដ៏ធ្ងន់ធ្ងរ។
ជាមួយនឹងការបរិច្ចាគលើកទីពីរនេះ
ចំនួនទឹកប្រាក់សរុបដែល Jungkook បានបរិច្ចាគទៅកាន់ Seoul National University Children’s Hospital
កើនឡើងដល់ ២ ពាន់លានវ៉ុន ឬជិត ១.៥ លានដុល្លារអាមេរិក។
ការចូលរួមជួយសង្គមរបស់ Jungkook ត្រូវបានមហាជនចាត់ទុកថា
ជាសកម្មភាពដ៏មានអត្ថន័យ
ព្រោះថវិកាទាំងនេះអាចជួយបំពេញតម្រូវការរបស់កុមារដែលត្រូវការការថែទាំ និងការព្យាបាល
ព្រមទាំងផ្តល់ក្តីសង្ឃឹមដល់គ្រួសារដែលកំពុងជួបការលំបាក។
គួរឱ្យកត់សម្គាល់ថា
ការបរិច្ចាគលើកនេះកើតឡើងក្នុងអំឡុងពេលដែល Jungkook
និងសមាជិក BTS កំពុងមមាញឹកជាមួយដំណើរប្រគំតន្ត្រីពិភពលោក
“ARIRANG” ដែលកំពុងទទួលបានជោគជ័យយ៉ាងខ្លាំង។
ថ្មីៗនេះ BTS បានបញ្ចប់ជើងប្រគំតន្ត្រីនៅអាមេរិកខាងជើង
ដោយបានសម្តែងសរុប ៣១ កម្មវិធី និងទាក់ទាញអ្នកគាំទ្រជិត ២ លាននាក់ ចូលរួមទស្សនា។
បន្ទាប់ពីបញ្ចប់ដំណាក់កាលនៅអាមេរិកខាងជើង
ក្រុម BTS កំពុងត្រៀមខ្លួនសម្រាប់ជើងបន្ទាប់នៃដំណើរប្រគំតន្ត្រីនៅ
អាមេរិកខាងត្បូង ដែលគ្រោងចាប់ផ្តើមនៅខែតុលាខាងមុខ។
ទោះបីកំពុងមានកាលវិភាគការងារដ៏មមាញឹកជាមួយដំណើរប្រគំតន្ត្រីជុំវិញពិភពលោកក៏ដោយ
Jungkook នៅតែបន្តបង្ហាញការយកចិត្តទុកដាក់ចំពោះសកម្មភាពសង្គម
តាមរយៈការចូលរួមជួយដល់កុមារ និងគ្រួសារដែលកំពុងជួបការលំបាក។
ការបរិច្ចាគចំនួន ២
ពាន់លានវ៉ុន ក្នុងរយៈពេលពីរលើក ទៅកាន់មន្ទីរពេទ្យកុមារ
ក៏បានបង្ហាញពីការប្តេជ្ញាចិត្តរបស់ Jungkook
ក្នុងការចូលរួមចំណែកជួយដល់សហគមន៍
និងផ្តល់ក្តីសង្ឃឹមដល់កុមារដែលកំពុងតស៊ូជាមួយបញ្ហាសុខភាព។
សម្រាប់អ្នកគាំទ្រ
សកម្មភាពនេះមិនត្រឹមតែជាការបរិច្ចាគថវិកាដ៏ធំមួយប៉ុណ្ណោះទេ
ប៉ុន្តែថែមទាំងជាសារមួយដែលបង្ហាញថា ភាពជោគជ័យរបស់សិល្បករ
ក៏អាចត្រូវបានបំលែងទៅជាកម្លាំងវិជ្ជមាន
ដើម្បីជួយដល់អ្នកដែលត្រូវការជំនួយក្នុងសង្គមផងដែរ។
