សមាជិកក្រុមចម្រៀងកូរ៉េខាងត្បូង Super Junior បរិច្ចាគថវិកា ១០០ លានវ៉ុន ក្នុងឱកាសថ្ងៃកំណើត ដើម្បីបង្កើតកន្លែងអានសៀវភៅសម្រាប់កុមារ

សមាជិកក្រុមចម្រៀងកូរ៉េខាងត្បូង Super Junior លោក Eunhyuk បានបង្ហាញពីទឹកចិត្តសប្បុរស និងការចូលរួមចំណែកជួយសហគមន៍ តាមរយៈការបរិច្ចាគថវិកាចំនួន ១០០ លានវ៉ុនកូរ៉េ ឬប្រមាណ ៧៤,៦៣០ ដុល្លារអាមេរិក ដើម្បីជួយបង្កើតទីកន្លែងថ្មីមួយ សម្រាប់កុមារអាចអានសៀវភៅ សិក្សា និងស្វែងយល់ពីពិភពនៃការស្រមើស្រមៃ។

ទីក្រុង Siheung ខេត្ត Gyeonggi ប្រទេសកូរ៉េខាងត្បូង បានរៀបចំពិធីសម្ពោធកន្លែងថ្មីនេះ កាលពីថ្ងៃទី៩ ខែកញ្ញា នៅមជ្ឈមណ្ឌលកុមារ Siheung Da Eoullim ក្នុងតំបន់ Jeongwang-dong។

កន្លែងនេះមានឈ្មោះថា “Everyone’s House: Imagination Playground Filled With Everyone’s Dreams” ដែលអាចបកប្រែជាភាសាខ្មែរថា “ផ្ទះរបស់គ្រប់គ្នា៖ ទីធ្លាស្រមើស្រមៃពោរពេញដោយក្តីស្រមៃរបស់គ្រប់គ្នា”។

តាមប្រភពព័ត៌មានបានឱ្យដឹងថា កន្លែងដែលមានស្រាប់ត្រូវបានកែលម្អ និងរចនាឡើងវិញ ឱ្យក្លាយជាទីលានលេង និងអានសៀវភៅដែលផ្តោតលើប្រធានបទ សៀវភៅរូបភាពសម្រាប់កុមារ ដោយប្រើប្រាស់ថវិកាចំនួន ១០០ លានវ៉ុន ដែលលោក Eunhyuk បានបរិច្ចាគទៅកាន់ ChildFund Korea កាលពីខែមេសា ក្នុងឱកាសអបអរថ្ងៃកំណើតរបស់លោក។

អ្វីដែលកាន់តែពិសេស គឺទីកន្លែងថ្មីនេះបានយកគំនិតមួយចំនួនពីស្នាដៃ និងពិភពសិល្បៈរបស់អ្នកនិពន្ធសៀវភៅរូបភាពដ៏ល្បី Anthony Browne មកប្រើប្រាស់ក្នុងការរចនា។

គោលបំណងសំខាន់ គឺដើម្បីបង្កើតបរិយាកាសមួយដែលកុមារ ជាពិសេសកុមារដែលមកពីគ្រួសារជនអន្តោប្រវេសន៍ អាចរីករាយជាមួយសៀវភៅ និងស្វែងយល់ពីរឿងរ៉ាវផ្សេងៗ ដោយមិនឱ្យភាពខុសគ្នាផ្នែកភាសា ក្លាយជាឧបសគ្គចំពោះការសិក្សា និងការស្រមើស្រមៃរបស់ពួកគេ។

ក្រៅពីការបរិច្ចាគលើកនេះ លោក Eunhyuk ក៏ជាសមាជិក Gold នៃ ChildFund Korea’s Green Noble Club ដែលជាក្រុមសម្រាប់ម្ចាស់ជំនួយធំៗផងដែរ។ សមាជិកភាពនេះត្រូវបានផ្តល់ជូនដល់បុគ្គលដែលមានការបរិច្ចាគសរុបលើសពី ៣០០ លានវ៉ុន ឬប្រមាណ ២២៣,៨៧៨ ដុល្លារអាមេរិក។ លោក Eunhyuk គឺជាសមាជិកលេខ ៤៨៧ របស់ក្រុមនេះ។

ការងារសប្បុរសធម៌របស់លោក ក៏មិនបានផ្តោតតែលើកុមារប៉ុណ្ណោះទេ។ លោកក៏ធ្លាប់ចូលរួមបរិច្ចាគថវិកាយ៉ាងសំខាន់ ដើម្បីគាំទ្រដល់អ្នកជំងឺដែលមានជំងឺសួតធ្ងន់ធ្ងរ ក្រុមអ្នកពន្លត់អគ្គិភ័យ ព្រមទាំងគ្រួសាររបស់អ្នកពន្លត់អគ្គិភ័យដែលបានបាត់បង់ជីវិតក្នុងពេលបំពេញភារកិច្ច។

អ្វីដែលគួរឱ្យកោតសរសើរ គឺលោក Eunhyuk បានបន្តសកម្មភាពសប្បុរសធម៌ជាប្រចាំអស់រយៈពេលជាង ៤ ឆ្នាំមកហើយ ដោយតែងតែយកឱកាសពិសេសៗ ដូចជាថ្ងៃកំណើត និងព្រឹត្តិការណ៍ផ្សេងៗ មកចែករំលែកក្តីស្រឡាញ់ និងជួយដល់អ្នកដែលត្រូវការជំនួយ។

សម្រាប់លោក Eunhyuk ថ្ងៃកំណើតមិនមែនមានន័យត្រឹមតែការទទួលបានកាដូ និងការអបអរពីអ្នកគាំទ្រនោះទេ ប៉ុន្តែវាក៏អាចក្លាយជាឱកាសមួយ ក្នុងការផ្តល់ក្តីសង្ឃឹម និងបង្កើតអនាគតដ៏ល្អប្រសើរជាងមុនសម្រាប់អ្នកដទៃផងដែរ។

ការបរិច្ចាគនេះ មិនត្រឹមតែបានជួយកែលម្អទីកន្លែងសម្រាប់កុមារប៉ុណ្ណោះទេ ប៉ុន្តែថែមទាំងបានបង្ហាញពីអត្ថន័យនៃការប្រើប្រាស់ឥទ្ធិពល និងភាពល្បីល្បាញ ដើម្បីបង្កើតការផ្លាស់ប្តូរវិជ្ជមាននៅក្នុងសង្គម។