ភ្នំពេញ ៖ 

បន្ទាប់ពីប្រកាសលាក្រុមគ្រួសារ និងបាត់ខ្លួន ២យប់ ២ថ្ងៃមកនោះ ទីបំផុត សពអតីតកីឡាករជម្រើសជាតិកម្ពុជា នុប តុលា បានរកឃើញហើយ នៅព្រឹកថ្ងៃទី២០ ខែវិច្ឆិកា ឆ្នាំ២០២៤ នេះ ។ នេះបើយោងតាមការបញ្ជាក់ពីលោក ស៊ុំ វណ្ណា គ្រូបង្វឹកសមាគមកីឡាបាល់ទាត់ក្រសួងមហាផ្ទៃ ។

មុនបាត់ខ្លួន នៅលើគណនីហ្វេសប៊ុកផ្លូវការរបស់ កីឡាករ នុប តុលា បានបង្ហោះសារចុងក្រោយលាក្រុមគ្រួសារ កាលពីថ្ងៃទី១៨ ខែវិច្ឆិកា ឆ្នាំ២០២៤ រួចហើយ ក្រុមគ្រួសារ ក៏បានស្វែងរក តែប្រទះឃើញតែម៉ូតូ និងសម្ភារៈប្រើប្រាស់ទុកចោលនៅជិតស្ពានព្រែកសំរោង ហៅស្ពានតាខ្មៅប៉ុណ្ណោះ​ ។ 

បើតាមការបញ្ជាក់របស់ភរិយាកីឡាករ នុប តុលា កំឡុងពេលស្វែងរកស្វាមី បានឲ្យដឹងថាការប្រកាសលាក្រុមគ្រួសារនេះ អាចដោយសារបញ្ហាបំណុលលេងល្បែងភ្នាក់បាល់ និងល្បែងអនឡាញ ម្ដងជាពីរដង ។ ការណ៍នេះ ទើបគេដាក់ការសង្ស័យថា កីឡាករតុលា បានបញ្ចប់ជីវិត ដែលធ្វើឲ្យមហាគ្រួសារបាល់ទាត់ជាតិ និងអ្នកគាំទ្រ មានការភ្ញាក់ផ្អើលជាខ្លាំង ។

ក្រោយទទួលដំណឹងមរណភាពខាងលើ ទាំងស្ថាប័នកីឡា ក្លិប និងអ្នកគាំទ្របាល់ទាត់ជាតិ បានផ្ញើសារចូលរួមរំលែកទុក្ខ ហើយបានបង្ហាញនូវការសោកស្ដាយផងដែរ ចំពោះការបាត់បង់នូវអតីតកីឡាករជម្រើសជាតិ ដែលធ្លាប់មានស្នាដៃជួយជាតិ និងលើកស្ទួយវិស័យបាល់ទាត់កម្ពុជារូបនេះ ។ គួររំលឹកថា កីឡា នុប តុលា បានផ្ដើមអាជីពបាល់ទាត់ជាមួយក្លិបព្រះខ័នរាជស្វាយរៀង ពីឆ្នាំ២០១៣-២០២០ មុនផ្ទេរទៅលេងឲ្យក្លិបណាហ្គាវើលដ៏ គិរីវង់សុខសែនជ័យ និងក្រសួងមហាផ្ទៃ ។ ចំពោះជម្រើសជាតិវិញ រូបគេបានលេងឲ្យក្រុមយុវជន និងក្រុមធំ នៃក្រុមជម្រើសជាតិកម្ពុជា តាំងពីឆ្នាំ២០១១ រហូតដល់ឆ្នាំ២០១៧ ៕