.png)
រាជធានីភ្នំពេញ ៖
រថយន្តដឹកអង្ករ១គ្រឿង ខណៈកំពុងបើកបរក្នុងល្បឿនលឿនគួរសមដែរ ស្រាប់តែមានរ៉ឺម៉កម៉ូតូ១គ្រឿង បើកឆ្លងកាត់ពីមុខ ធ្វើឲ្យរថយន្តនោះ វាក់ហើយអ្នកបើកបរកាច់ចង្កូតគេចចេញ ក៏រេចង្កូតក្រឡាប់ផ្ញារជើងចាក់បាវអង្ករចោលលើផ្លូវ ។
ហេតុការណ៍នេះ បានកើតឡើងកាលពីវេលាម៉ោង១០ព្រឹកថ្ងៃទី២០ ខែវិច្ឆិកា ឆ្នាំ២០២៤ ស្ថិតនៅតាមផ្លូវ៣០ម៉ែត្រ ភូមិរោលជ្រូក សង្កាត់ព្រៃវែង ខណ្ឌដង្កោ រាជធានីភ្នំពេញ ។ ប្រជាការពារភូមិ បាននិយាយថានៅមុនពេលកើតហេតុ មានរថយន្ត១គ្រឿងម៉ាក
ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3F-0197 បើកបរដោយបុរសម្នាក់ ធ្វើដំណើរក្នុងទិសដៅពីលិចទៅកើត ដោយបានដឹកអង្ករ ចេញពីបុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ឆ្ពោះទៅកាន់ផ្សារអូរឫស្សី ខណ្ឌ៧មករា រាជធានីភ្នំពេញ ។
ប្រជាការពារ បាននិយាយបន្តទៀតថាខណៈកំពុងបើកបរក្នុងល្បឿនលឿនគួរសមដែរ ស្រាប់តែមានរ៉ឺម៉កម៉ូតូ១គ្រឿង បើកឆ្លងកាត់ពីមុខ ធ្វើឲ្យរថយន្តនោះ វាក់ហើយអ្នកបើកបរកាច់ចង្កូតគេចចេញ ក៏រេចង្កូតក្រឡាប់ផ្ញារជើងចាក់បាវអង្ករចោលលើផ្លូវ តែម្ដង ប៉ុន្តែសំណាងល្អ មិនបានបណ្ដាលឲ្យអ្នកបើកបរឬ អ្នកដំណើរណាម្នាក់រងរបួសនោះឡើយ ។
ក្រោយពេលកើតហេតុម៉ូតូសណ្ដោងរ៉ឺម៉ក បានបើកគេចទៅបាត់ស្រមោល ចំណែកនគរបាលប៉ុស្តិ៍ចោមចៅទី២ បានចុះទៅពិនិត្យមើលជាក់ស្ដែង រួចឲ្យម្ចាស់ស្ទូចលើកយករថយន្តទៅធ្វើការជួសជុលឡើងវិញដោយខ្លួនឯង ៕
