រាជធានីភ្នំពេញ ៖

យុវជនមួយក្រុមជិះម៉ូតូជាច្រើនគ្រឿង ធ្វើសកម្មភាពយកដុំថ្មគប់សំដៅទៅលើ KTV យីហោតន្រ្តីឫស្សីមាស មួយកន្លែង បណ្ដាលឲ្យនារីពីរនាក់ រងរបួសត្រង់ដៃ ហើយ ក៏ត្រូវបានសមត្ថកិច្ចឃាត់ខ្លួនបាន២នាក់ យកទៅប៉ុស្តិ៍កាកាបទី១ សួរនាំបន្ត ។ ហេតុការណ៍ខាងលើនេះ បង្កការភ្ញាក់ផ្អើលកាលពីវេលាម៉ោង១:៣០នាទីរំលងអាធ្រាត្រឈានចូលថ្ងៃទី០៥ខែធ្នូ ឆ្នាំ២០២៤ ចំណុចផ្លូវ២០០៤ក្បែស្តុបវត្តអង្គតាមិញ ស្ថិតក្នុង សង្កាត់ កាកាបទី១ ខណ្ឌពោធិសែនជ័យ ។

ប្រភពពីកន្លែងដែលកើតហេតុ បានឲ្យដឹងថានៅមុនពេលកើតហេតុ មាននារី រួមទាំងបុរសបម្រើកាងារក្នុងហាងKTVយីហោ តន្រ្តីឫស្សីមាស បាននាំគ្នាអង្គុយចាំ ហៅម៉ូយ នៅខាងមុខហាង ជាធម្មតា។ លុះមកដល់វេលាម៉ោងកើតហេតុខាងលើ ស្រាប់តែលេចមុខ ក្មេងទំនើងមួយក្រុមជិះម៉ូតូជាច្រើនគ្រឿង ពុំដឹងថាធ្លាប់មានទំនាស់ជាមួយម្ចាស់ហាង ពីពេលណាមកនោះទេ ស្រាប់តែនាំគ្នាឈប់ម៉ូតូនៅខាងមុខហាង រួចនាំគ្នាទាញដុំថ្មជាច្រើនដុំគប់សំដៅលើ ហាងKTV តន្រ្តីឫស្សីមាស បណ្តាលឲ្យត្រូវសម្ភារៈខាងក្នុង ខូចខាត មួយចំនួននិងត្រូវចំដៃ ភាគីនារីបម្រើកាងារនៅក្នុងហាង ចំនួន២នាក់ ។

ភ្លាមនោះដែរ ក៏បានប្រជាពលរដ្ឋក្បែរខាងនិងបុគ្គលិកនៅក្នុងហាង នាំគ្នាព្រួតចូលទៅតដៃ ប្រតាយប្រតប់គ្នា ក៏ឃាត់បានយុវជន២នាក់ទុកប្រគល់ជូនសមត្ថកិច្ច ចំណែកឯបក្ខពួកផ្សេងទៀត បានរត់គេចខ្លួនបាត់ស្រមោល ។

បន្ទាប់ពីកើតហេតុខាងលើ សមត្ថកិច្ចមូលដ្ឋានក៏បានចុះមកដល់សួរនាំទៅលើម្ចាស់ហាង រួចនាំឲ្យយុវជនទាំងពីរនាក់ជាជនបង្ក យកទៅប៉ុស្តិ៍នគរបាលសង្កាត់កាកាបទី១ដើម្បីសួរនាំបន្តនិងចាត់ការតាមនីតិវិធីច្បាប់ ៕