រដ្ឋមន្ត្រីការពារជាតិប្រទេសប៉ូឡូញបានបញ្ជាក់កាលពីថ្ងៃចន្ទ ទី31 ខែមីនាថា ប្រទេសប៉ូឡូញ និងសហរដ្ឋអាមេរិក បានចុះហត្ថលេខាលើកិច្ចព្រមព្រៀងដែលមានតម្លៃជិត 2 ពាន់លានដុល្លារ ក្នុងការផ្តល់ការគាំទ្រផ្នែកដឹកជញ្ជូនសម្រាប់ប្រព័ន្ធការពារដែនអាកាស ផេត្រយ (Patriot)។ កិច្ចព្រមព្រៀងជាមួយសហរដ្ឋអាមេរិកទាក់ទងនឹងការផ្តល់ជំនួយសម្រាប់ប្រព័ន្ធការពារដែនអាកាស ក៏នឹងរួមបញ្ចូលទាំងផ្នែកជំនួយបច្ចេកទេស ក៏ដូចជាការបណ្តុះបណ្តាលផងដែរ។ ប្រទេសប៉ូឡូញ កំពុងបង្កើនសមត្ថភាពការពាររបស់ខ្លួន ក្នុងនាមជាតួអង្គសំខាន់មួយរបស់អង្គការណាតូ ដែលស្ថិតនៅតំបន់ភាគខាងកើត កំពុងត្រៀមរៀបចំការពារប្រទេសរបស់ខ្លួន បន្ទាប់ពីប្រទេសរុស្ស៊ី បើកការឈ្លានពានលើប្រទេសជិតខាងរបស់ខ្លួន គឺអ៊ុយក្រែននោះ។
