ក្រុមអ្នកជួយសង្រ្គោះ កំពុងបន្តប្រតិបត្តិការជួយសង្រ្គោះនៅក្នុងប្រទេសមីយ៉ាន់ម៉ា បន្ទាប់ពីគ្រោះរញ្ជួយដី បានឆក់យកជិវិតមនុស្សប្រមាណ 2700 នាក់ និងជំរុញឲ្យប្រជាជនជាច្រើននាក់ទៀតកំពុងប្រឈមនឹងវិបត្តិស្បៀងអាហារ ទឹក និងទីជម្រក។ មេដឹកនាំរបបយោធារបស់ប្រទេសមីយ៉ាន់ម៉ា លោក មីន អ៊ុងឡាំង បានបញ្ជាក់ថា ចំនួនអ្នកស្លាប់ដោយគ្រោះរញ្ជួយដីកម្រិត 7.7 រិចទ័រ អាចកើនលើស 3000 នាក់ ខណៈដែលបច្ចុប្បន្នចំនួនអ្នកស្លាប់បានកើនដល់ 2719 នាក់ ប្រមាណ 4521 នាក់រងរបួស និង 441 នាក់ទៀតបាត់ខ្លួន។ គួរបញ្ជាក់ផងដែរថា គ្រោះរញ្ជួយដីនេះ គឺជាការវាយប្រហារចុងក្រោយបង្អស់លើប្រទេសមីយ៉ាន់ម៉ា ដែលមានប្រជាជនរស់នៅសរុបចំនួន 53 លាននាក់ បន្ទាប់ពីការធ្វើរដ្ឋប្រហារកាលពីឆ្នាំ 2021 ដោយរបបយោធា ដែលបានបង្កទៅជាជម្លោះស៊ីវិល និងបំផ្លិចបំផ្លាញសេដ្ឋកិច្ចរបស់ប្រទេសនេះយ៉ាងធ្ងន់ធ្ងរនោះ។
