តារាចម្រៀងជនជាតិកូរ៉េ ហូអ៊ីន ហ្វាង់ ដែលកំពុងរះនៅក្នុងវិស័យសិល្បៈខ្មែរ ហាក់មានការកាក់កបជាមួយនឹងវិស័យនេះជាខ្លាំង ក្រោយពេលប្រលងចប់នៅក្នុងកម្មវិធីប្រកួតចម្រៀងលំដាប់ថ្នាក់ពិភពលោក The Voice Cambodia រដូវកាលទី៣ រួចមក។
បើរំលឹកទៅកាលពីពេលជាបេក្ខនារីប្រលងនៅក្នុងកម្មវិធីប្រកួតចម្រៀងខាងលើ តារាស្រីរូបនេះ គឺជាកូនក្រុមរបស់តារាចម្រៀងដ៏ល្បីល្បាញ ពេជ្រ សោភា។ ជាមួយគ្នានេះ ហូអ៊ីន ក៏អាចចាត់ទុកបានថាជាបេក្ខនារីដ៏ខ្លាំងម្នាក់នៅក្នុងចំណោមបេក្ខជន បេក្ខនារី ផ្សេងទៀតផងដែរ។ ប៉ុន្តែគួរឱ្យសោកស្តាយ នៅក្នុងការប្រកួត ហូអ៊ីន បានឈានមកដល់ត្រឹមវគ្គ Live Show សប្តាហ៍ទី៤ ប៉ុណ្ណោះ។
យ៉ាងណាមិញ ទោះបីជាតារាចម្រៀងស្រីរូបនេះមិនអាចបន្តនៅក្នុងកម្មវិធី The Voice Cambodia រដូវកាលទី ៣ ក៏ដោយ ក៏នាងមិនបានបោះបង់ក្តីស្រមៃរបស់ខ្លួនឯងនោះឡើយ ដោយនៅតែបន្តដើរនៅលើវិថីសិល្បៈតាមរយៈការច្រៀង សម្តែង និងថតស្ពតពាណិជ្ជកម្មជាដើម។ ទន្ទឹមនឹងភាពជោគជ័យបានមួយកម្រិតនេះ កាលពីពេលថ្មីៗកន្លងទៅ ហូអ៊ីន ហ្វាង់ ស្រាប់តែលេចវត្តមាននៅក្នុងវីដេអូចម្រៀងរបស់លោក នីកូ យ៉ាងភ្ញាក់ផ្អើល និងទទួលបានការសាទរពីមហាជនជាខ្លាំង។ នៅក្នុងវីដេអូដែល ហ៊ូអ៊ីន បានចូលរួមសម្តែងនោះមានចំណងជើងថា “នៅឯណា?” ។
ស្របពេលដែលបទចម្រៀងខាងលើបានបញ្ចេញនៅលើបណ្តាញសង្គមភ្លាម ស្រាប់តែ ហ៊ូអ៊ីន បានបង្ហាញអារម្មណ៍រំភើបរបស់ខ្លួននៅលើទំព័រហ្វេសប៊ុក ដែលបានចូលរួមសម្តែងនៅក្នុងវីដេអូចម្រៀងជាលើកដំបូងជាមួយតារាចម្រៀងជួរមុខនៅក្នុងប្រទេសកម្ពុជា លោក នីកូ ។
គួរឱ្យដឹងបន្ថែមថា ក្រៅពីអាជីពជាតារាចម្រៀង និងតារាសម្តែង ហ៊ូអ៊ីន ហ្វាង់ ក៏ជាអ្នកជំនួញវ័យក្មេងមួយរូបនៅក្នុងប្រទេសកម្ពុជាផងដែរ៕
