(ឧត្តរមានជ័យ) ៖
រថយន្តក្រុងប្រភេទទេសចរណ៏ ៤៥កៅអីមួយគ្រឿង បើកបោះពួយយ៉ាងលឿនក៏រេចង្កូត បុកចូលផ្ទះប្រជាពលរដ្ឋទាំងកម្រោលបង្កការភ្ញាក់ផ្អើលទៅដល់អ្នកភូមិព្រមទាំងអ្នកធ្វើដំណើរភ័យស្លន់ស្លោរត់ឆ្លេឆ្លានាំគ្នារត់ចេញពីក្នុងឡានឈរត្រៀបត្រាពេញផ្លូវ។
ដែលហេតុការណ៍គ្រោះថ្នាក់ចរាចរណ៍នេះបានកើតឡើងនៅលើផ្លូវជាតិលេខ៦៨ ស្ថិតនៅក្នុងភូមិចុងកាល់ ឃុំចុងកាល់ ស្រុកចុងកាល់ ខេត្តឧត្តរមានជ័យ កាលពីវេលាម៉ោង៦ជាង ថ្ងៃទី០១ ខែមេសា ឆ្នាំ២០២៥។
ប្រភពពីកន្លែងកើតហេតុបានឲ្យដឹងថាមុនដំបូងឡើយគាត់បានឃើញរថយន្តក្រុងពណ៌ស ខាងលើនេះបើកទិសដៅពីត្បូងទៅជើងលុះមកដល់ចំណុចកើតហេតុទំនងជាតៃកុងងោកមួយភាំងក៏បានរ៉េចង្កូតធ្លាក់ផ្លូវ ឆ្ពោះទៅមុខចូលផ្ទះប្រជាពលរដ្ឋទាំងកម្រោលតែម្ដង ។
បើយោងតាមសាក្សីនៅទីតាំងកើតហេតុផ្ទាល់បានអះអាងបន្តថា ឡានក្រុងពណ៌សដែលបុកចូលផ្ទះប្រជាពលរដ្ធនេះដែរត្រូវគេស្គាល់ថា ជាក្រុមហ៊ុន(ធីវរ:ដឹកអ្នកដំណើរមានទីតាំងស្ថិតនៅក្នុងក្រុងសំរោង ខេត្តឧត្តរមានជ័យ)។
បើយោងតាមសមត្ថកិច្ចមូលដ្ឋាននៅកន្លែងកើតហេតុបានឲ្យដឹងថាចំពោះករណីនេះពុំមានបង្កគ្រោះថ្នាក់ដល់មនុស្ស និងអ្នកធ្វើដំណើរឡើយគ្រាន់តែខូចខាត សម្ភារៈ របស់អ្នកផ្ទះតែប៉ុណ្ណោះ។
សូមជម្រាបផងដែរថាក្រោយកើតហេតុរួច ខាងក្រុមហ៊ុនឡានក្រុងបានព្រមសងសំណងទៅដល់ម្ចាស់ផ្ទះ និងបានហៅរថយន្តស្ទូចដើម្បីស្ទូចយកទៅខេត្តសៀមរាបធ្វើការជួសជុលនៅយានដ្ឋាន នៅព្រឹកនេះផងដែរ។
