នាយកដ្ឋានរៀបចំព្រឹត្តិការណ៍និងស្ថិតិកីឡាបានរៀបចំ បើកវគ្គបំប៉នសមត្ថភាព ស្តីពី “ការរៀបចំ និងគ្រប់គ្រងព្រឹត្តិការណ៍កីឡា” ក្រោមអធិបតីភាព ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា នាព្រឹកថ្ងៃទី១ ខែមេសា ឆ្នាំ២០២៥ ម្សិលមិញនេះ។
លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍និងស្ថិតិកីឡា បានបញ្ជាក់ថា ការរៀបចំវគ្គបំប៉ននេះ គឺដើម្បីពង្រឹងសមត្ថភាពអ្នកចូលរួមឱ្យទទួលបាននូវ ចំណេះដឹង ជំនាញ និងឧបករណ៍អនុវត្តជាក់ស្តែងដែលត្រូវការដើម្បីរៀបចំផែនការ រៀបចំនិងគ្រប់គ្រងព្រឹត្តិការណ៍កីឡា នៅកម្រិតផ្សេងៗប្រកបដោយប្រសិទ្ធភាព លើកកម្ពស់វិជ្ជាជីវៈ ធានាការអនុវត្តព្រឹត្តិការណ៍កីឡាប្រកបដោយជោគជ័យ លើកកម្ពស់ការងារជាក្រុមឱ្យមាននិរន្តរភាព ព្រមទាំងបង្កើនធនធានមន្រ្តីកីឡា នៅតាមសហព័ន្ធកីឡាជាតិ ឱ្យការរៀបចំមានស្តង់ដាតែមួយស្របទៅតាមលក្ខណៈជាតិ និងអន្តរជាតិ។ វគ្គបំប៉ន់នេះមានសិក្ខាកាមចូលរួមចំនួន សរុប ៨០នាក់ មកពី ២៥ មន្ទីរអប់រំ យុវជន និងកីឡា រាជធានី ខេត្ត ចំនួន៥០ នាក់ និងសហព័ន្ធកីឡាជាតិ ចំនួន ៣០នាក់។
ក្នុងឱកាសបើកវគ្គបំប៉ន់នេះ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា បានកោតសរសើរ និងវាយតម្លៃខ្ពស់ចំពោះអង្គភាពជំនាញ ដែលជាសេនាធិការរបស់ក្រសួងអប់រំ យុវជន និងកីឡា បានខិតខំប្រឹងប្រែងបំពេញភារកិច្ចយ៉ាងសកម្ម ក្នុងការរៀបចំវគ្គបំប៉នដ៏មានសារៈសំខាន់នេះ ព្រមទាំងអញ្ជើញមន្ត្រីមន្ទីរអប់រំ យុវជន និងកីឡារាជធានី ខេត្ត សហព័ន្ធកីឡាជាតិ និងស្ថាប័នពាក់ព័ន្ធ ដើម្បីពង្រឹងសមត្ថភាព ស្តីពីការរៀបចំ និងគ្រប់គ្រងព្រឹត្តិការណ៍កីឡា និងបង្កើនធនធានមន្រ្តីកីឡាពាក់ព័ន្ធបំរើឱ្យការងារកីឡា ទទួលបានបទពិសោធន៍ក្នុងការរៀបចំព្រឹត្តិការណ៍កីឡាមានលក្ខណៈស្តង់ដា ស្របតាមការរៀបចំក្នុងតំបន់។
ឯកឧត្តម រដ្ឋលេខាធិការ បានផ្តាំផ្ញើដល់សិក្ខាកាមទាំងអស់ដែលអញ្ជើញចូលរួមក្នុងវគ្គដ៏មានតម្លៃនាពេលនេះ ត្រូវយកចិត្តទុកដាក់ ខិតខំប្រឹងប្រែងក្របយកចំណេះដឹងថ្មីៗដែលគ្រូបានផ្តល់ឱ្យ ដើម្បីយកទៅអនុវត្តក្នុងការរៀបចំ ដឹកនាំ និងគ្រប់គ្រងការប្រកួតក្នុងកម្រិតក្រោមជាតិ ជាតិ អន្តរជាតិ ឱ្យមានប្រសិទ្ធភាព ឆ្ពោះទៅឆ្នាំ២០២៨ និងឆ្នាំ២០២៩៕
