ក្រចេះ ៖
សត្វមាន់-ទាឈឺ ឬងាប់ប្រមាណជា ១៥៥ក្បាល ស្ថិតនៅភូមិក្រគរ សង្កាត់ក្រគរ ក្រុងក្រចេះ ខេត្តក្រចេះ មន្ត្រីជំនាញការិយាល័យផលិតកម្ម និងបសុព្យាបាល ព្រួយបារម្ភជា រោគសញ្ញាផ្ដាសាយបក្សី។ នេះតាមការឲ្យដឹងពីលោក កេត សារឿន ប្រធានការិយាល័យ បានឲ្យ កម្ពុជាថ្មី ដឹងនៅព្រឹកថ្ងៃទី១ ខែមេសា ឆ្នាំ២០២៥នេះ។
លោកបានបន្តថា លោកបានទទួលព័ត៌មានពីប្រជាពលរដ្ឋនៅថ្ងៃទី៣១ ខែមីនា ឆ្នាំ២០២៥ ដោយយោងតាមការសាកសួរប្រជាពលរដ្ឋ បានឲ្យដឹងថាសត្វមាន់-ទា ទាំងនោះ ចាប់ផ្ដើមឈឺប្រហែលជា ១០ថ្ងៃមុន លុះ១០ថ្ងៃក្រោយមក ទើបគាត់រាយការមកជំនាញ។
ជាក់ស្ដែង នៅព្រឹកថ្ងៃទី១ ខែមេសា ឆ្នាំ២០២៥ នេះ មន្ត្រីជំនាញការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ចុះអន្តរាគមន៍បាញ់សម្លាប់មេរោគ និងតាមដានសុខភាពសត្វនៅទីតាំងកើតហេតុខាងលើ។
នៅព្រឹកថ្ងៃដដែលនេះដែរ មន្ត្រីជំនាញបានចុះតាមដានសុខភាពសត្វមាន់ និងទា នៅក្នុងភូមិកើតហេតុបានចំនួន ០៦ខ្នងផ្ទះ មាន់-ទា ទាំងអស់មានសុខភាពល្អ និងបានចុះ យកសំណាក សត្វមាន់ចំនួន ០២ក្បាល សត្វទា ០១ក្បាល ផ្ញើទៅពិនិត្យនៅវិទ្យាស្ថានជាតិស្រាវជ្រាវសុខភាពសត្វ និងផលិតកម្មសត្វ ដើម្បីតាមដានរោគសញ្ញាជាក់លាក់។ លើសពីនោះ ក្រុមការងារក៏បាញ់ថ្នាំសំលាប់មេរោគ បានចំនួន ០៣ខ្នងផ្ទះ ជាកន្លែងមានមាន់ងាប់ ហើយពេលរសៀលថ្ងៃដដែលនេះ ក្រុមការងារនឹងបន្តចុះបាញ់ថ្នាំសម្លាប់មេរោគបន្តទៀតផងដែរ។
ចំពោះករណីសត្វមាន់-ទា ងាប់នេះដែរ លោក កេត សារឿន បានបញ្ជាក់ថា តាមការសន្និដ្ឋានជាក់ស្ដែង ជាជំហានដំបូង ករណីសត្វមាន់-ទា ឈឺ ឬងាប់ខាងលើនេះ អាចបង្កឡើងដោយបញ្ហាបំរែបំរួលអាកាសធាតុ។ ចំពោះរោគសញ្ញា មន្ត្រីជំនាញ មិនទាន់ប្រាកដទេ រងចាំលទ្ធផលនៃវត្ថុវិភាគចេញមកសិន៕
