ភ្នំពេញ ៖
បុរសជាអតីតអ្នកដឹកសាច់គោឲ្យទីសត្តឃាតម្នាក់ដែលបានចោទប្រកាន់ប្រពន្ធរបស់ខ្លួនថាមានប្រុសថ្មីក្នុងអំឡុងពេលខ្លួនកំពុងជាប់ពន្ធនាគារ រួចនាំកូនប្រុសស្រីរត់ចោលទៀតនោះ ខណៈនេះត្រូវបានគេប្រទះឃើញធ្វើអត្តឃាតចង ក សម្លាប់ខ្លួន ។ ពេលនេះប្រពន្ធបានចេញមុខបកស្រាយហើយថា គាត់មិនមានប្រុសថ្មីអីទេ ប៉ុន្តែប្ដីគាត់វិញជាមនុស្សសេពគ្រឿងញៀន និងងប់ងល់ជាមួយល្បែងសុីសង ហើយជាប់គុកក៏ព្រោះតែយកម៉ូតូគេលក់លេងល្បែងដែរ មិនតែប៉ុណ្ណោះពេលចេញពីគុកវិញតែងរករឿងនិងយកកាំបិតចង់អារ ក សម្លាប់គាត់ចោលទើបគាត់ខ្លាចហើយនាំកូនៗទៅស្នាក់នៅផ្ទះម្ដាយមីងឯបុរីពិភពថ្មីបណ្ដោះអាសន្ន មិនបានរត់តាមប្រុសឡើយ ។
បុរសនោះត្រូវបានគេប្រទះឃើញចង ក ស្លាប់បង្កឲ្យមានការភ្ញាក់ផ្អើល កាលពីវេលាម៉ោង១១និង១៥នាទី ព្រឹកថ្ងៃទី៣ ខែមេសា ឆ្នាំ២០២៥ នៅក្នុងបន្ទប់ជួលមួយកន្លែង ស្ថិតនៅក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បុរសខាងលើឈ្មោះ ប៉ុន ប៉ុល អាយុ៤៥ឆ្នាំ មានស្រុកកំណើតនៅភូមិរាយប៉ាយលើ ឃុំរាយប៉ាយ ស្រុកកងមាស ខេត្តកំពង់ចាម អតីតជាកម្មករដឹកសាច់គោកុងស៊ីកាប់គោមួយកន្លែងនៅឃុំទួលព្រេជ ស្រុកអង្គស្នួល ខេត្តកណ្ដាល។ មានប្រពន្ធឈ្មោះ ចន ចាន់ថន អាយុ៣៨ឆ្នាំ មានស្រុកកំណើតភូមិល្វា ឃុំល្វា ស្រុកព្រៃឈរ ខេត្តកំពង់ចាម មុខរបរកម្មការិនីរោងចក្រស្បែកជើង យីង ដុង ស្ថិតនៅភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ ពួកគាត់បានរៀបការជាមួយគ្នារយៈពេល ១៩ឆ្នាំមកហើយ តាំងពីឆ្នាំ២០០៦មកម្ល៉េះ និងបង្កើតបានកូនប្រុសចំនួន៣ និងកូនស្រី១នាក់ទៀតផង។
បើតាមបុរសអ្នកលក់អីវាន់ចាប់ហួយម្នាក់បាននិយាយថា បុរសនោះបានជំពាក់ប្រាក់ថ្លៃអីវាន់ចាប់ហួយគាត់ច្រើនដែរ ហើយនៅមុនពេលកើតហេតុគាត់បានឡើងទៅរកទារប្រាក់ដែលជំពាក់នៅបន្ទប់ជួល។ លុះពេលទៅដល់ឃើញទ្វារបន្ទប់បិទជិត ពេលនោះគាត់បានរុញទ្វារចូលទៅស្រាប់តែឃើញបុរសនោះចង ក នឹងខ្សែអង្រឹងជាប់ទ្វារបន្ទប់ទឹកស្លាប់បាត់ទៅហើយ ដោយពុំដឹងថាស្លាប់តាំងពីពេលណាទេ ទើបស្រែកប្រាប់អ្នកជិតខាងឲ្យជួយមើលបង្កការភ្ញាក់ផ្អើលដល់នគរបាលចុះទៅធ្វើកោសល្យវិច័យតែម្ដង។
ចំណែកស្រ្តីជាប្រពន្ធក្រោយពេលដឹងថា បុរសជាប្ដីរូបនេះចង ក សម្លាប់ខ្លួនក៏បានទៅកាន់ទីនោះហើយបានបដិសេធន៍ថាគាត់គ្មានអ្នកថ្មីទេ ហើយថាប្ដីគាត់ម្នាក់នេះប្រើប្រាស់គ្រឿងញៀន ហើយងប់នឹងលេងល្បែងសុីសង ល្បែងណែត បំផ្លាញទ្រព្យសម្បត្តិក្នុងផ្ទះ។ រហូតក្រោយមកធ្លាក់ខ្លួនខ្ចីម៉ូតូគេទៅលក់យកលុយលេងល្បែងទើបម្ចាស់គេប្ដឹងដាក់ពន្ធនាគារ មិនតែប៉ុណ្ណោះកន្លងមកប្ដីរូបនេះតែងតែគំរាមសម្លាប់នាងចោលរហូត ជាក់ស្ដែងនៅថ្ងៃទី៨ ខែមីនា ឆ្នាំ២០២៥ បានយកកាំបិតប្រុងអារ ក សម្លាប់នាងចោល ដោយនិយាយថាសម្លាប់នាងរួច អារ ក សម្លាប់ខ្លួនឯងតាមក្រោយ ហើយកូនទៅណាទៅៗ ពេលនោះដោយខ្លាចស្លាប់ ទើបនាងនាំកូនៗគេចចេញពីផ្ទះទៅនៅផ្ទះម្ដាយមីងឯបុរីពិភពថ្មី២ ជាបណ្ដោះអាសន្នប៉ុណ្ណោះ។
ស្រ្តីរូបនោះបាននិយាយបន្តទៀតថា ពេលនោះប្ដីនៅផ្ទះជួលខាងលើតែម្នាក់ឯងរហូតមកហើយនាងក៏មិនបានដឹងរឿងថាប្ដីមានរឿងអ្វីទើបចង ក សម្លាប់ខ្លួនដែរ ប៉ុន្តែមុនពេលស្លាប់ប្ដីបានយកម៉ូតូបងរបស់ខ្លួន១គ្រឿងទៅបញ្ចាំយកលុយលេងល្បែង ហើយសង្ស័យពិបាកចិត្តរឿងនឹងទើបចង កសម្លាប់ខ្លួនក៏មិនដឹងដែរ៕
