អ្នកសារព័ត៌មាន វិទ្យុ ទូរទស្សន៍ គេហទំព័រក្នុងស្រុក និង សហព័ន្ធ ស.ស.យ. ក ជាង ១០០នាក់ បានអញ្ជើញចូលរួមសិក្ខាសាលាផ្សព្វផ្សាយពីព្រឹត្តិការណ៍សង្រ្កាន្តឆ្នាំ២០២៥ ក្រោមប្រធានបទ ញញឹមសាទរសង្រ្កានឆ្នាំថ្មី ដែលបានប្រារព្ធធ្វើឡើងនៅក្នុងក្រុងសៀមរាប កាលពីព្រឹកថ្ងៃទី០២ ខែមេសាឆ្នាំ២០២៥ កន្លងទៅ ក្នុងគោលបំណងជំរុញឲ្យអ្នកសារព័ត៌មាន ក្នុងស្រុក និងក្រៅស្រុក ចូលរួមផ្សព្វផ្សាយ ព្រឹត្តិការណ៍អង្គរសង្រ្គានឆ្នាំនេះ ឲ្យផុសផុល នូវព្រឹត្តការណ៍ធំមួយនៅក្នុងទឹកដីមហានគរ នៃខេត្តសៀមរាប ។
ឯកឧត្តម សោម រតនា ប្រធានក្រុមការងារសាធារណៈព្រឹត្តិការណ៍អង្គរសង្រ្កានឆ្នាំ២០២៥ មានប្រសាសន៍ថា កម្ពុជារៀបចំពិធីបុណ្យអង្គរសង្រ្កាន គឺជាព្រឹត្តិការណ៍វប្បធម៌ និងទេសចរណ៍ដ៏ធំនៃប្រទេសកម្ពុជា ដែលរៀបចំឡើងប្រចាំឆ្នាំនៅខែមេសា ក្នុងខេត្តសៀមរាប ។
ព្រឹត្តិការណ៍នេះមិនត្រឹមតែជាការអបអរសាទរឆ្នាំថ្មីប៉ុណ្ណោះទេ ប៉ុន្តែវាជាឱកាសដ៏ពិសេសសម្រាប់ប្រជាពលរដ្ឋខ្មែរ និងភ្ញៀវទេសចរ បានស្វែងយល់អំពីវប្បធម៌ប្រពៃណីខ្មែរ ក្នុងគោលបំណងជំរុញការចូលរួមរបស់ប្រជាពលរដ្ឋ និងភ្ញៀវទេសចរ ក៏ដូចជាការលើកកម្ពស់ភាពអស្ចារ្យនៃអរិយធម៌ខ្មែរ ផងដែរ ។
លោក ង៉ូវ សេងកាក់ អភិបាលរង ខេត្តសៀមរាប មានប្រសាសន៍ថា យើងទាំងអស់គ្នាជាម្ចាស់ផ្ទះ ម្ចាស់មូលដ្ឋាន គឺត្រូវដើរតួនាទីសំខាន់ ក្នុងការធ្វើជាអ្នកផ្សព្វផ្សាយ និងមានការបង្ហាញពីប្រវត្តិនៃបុណ្យអង្គរសង្រ្កាន បង្ហាញសិល្បៈវប្បធម៌ និងប្រពៃណីខ្មែរ និងការប្រកួតល្បែងប្រជាប្រិយ និងល្បែងបុរាណខ្មែរ ការប្រគុំតន្ត្រីបុរាណ និងទំនើបការដង្ហែសំពត់បុណ្យបុរាណ និងការតាំងពិព័រណ៍សិល្បៈខ្មែរ ជាដើម ។
ឯកឧត្តម សុខ សប្បាយណា ប្រធានក្រុមការងារប្រតិបត្តិ នៃ ព្រឹត្តិការណ៍អង្គរសង្រ្កានឆ្នាំ២០២៥បានបញ្ជាក់ថា ព្រឹត្តិការណ៍អង្គរសង្រ្កាន ត្រូវបានរៀបចំឡើង ដោយ ស.ស.យ.ក សហការរវាងរដ្ឋាភិបាល ក្រុមហ៊ុនឯកជន ស្ថាប័នវប្បធម៌ និងអង្គការមិនមែនរដ្ឋាភិបាល ដើម្បីរួមគ្នាធ្វើឲ្យព្រឹត្តិការណ៍ ដ៏សែនអស្ចារ្យនៃទឹកដីមហានគរដ៏រុងរឿងមួយនេះ មានគេរ្ត៍ឈ្មោះបោះសំលេងទៅទូទាំងពិភពលោក ៕
