ភ្នំពេញ ៖
ផ្ទះប្រជាពលរដ្ឋមួយខ្នងស្ថិតនៅតាមបណ្ដោយអតីតផ្លូវរថភ្លើងក្នុងភូមិក្រោលគោ សង្កាត់គីឡូម៉ែលេខ៦ ខណ្ឌឬស្សីកែវត្រូវបានអគ្គីភ័យឆាបឆេះផ្សែងហ៊ុយទ្រលោមខណៈពេលដែលម្ចាស់ផ្ទះស្លទុកចោល។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១០ព្រឹកថ្ងៃទី២ ខែមេសាឆ្នាំ២០២៥ដោយ ប្រជាពលរដ្ឋ និងអាជ្ញាធរ មូលដ្ឋានបានចុះទៅជួយអន្តរាគមន៍បាញ់ពន្លត់ទាន់។ នេះចាត់ទុកជាសំណាងល្អដែលភ្លើងពុំឆេះរាលដាលធ្ងន់ធ្ងរព្រោះតំបន់នោះជាផ្ទះឈើប្រក់ស័ង្កសីដែលសង់នៅជាប់ៗគ្នាងាយរងគ្រោះណាស់។
តាមព័ត៌មានបានឲ្យដឹងថា នៅមុនពេលកើតហេតុគេឃើញម្ចាស់ផ្ទះបានចាក់សោទុកចោលហើយគេឃើញផ្សែងហ៊ុយទ្រលោមចេញពីក្នុងផ្ទះបង្កឲ្យមានការភ្ញាក់ផ្អើលដល់ប្រជាពលរដ្ឋក្បែរខាងទាក់ទងទៅសមត្ថកិច្ច និងអាជ្ញាធរដើម្បីហៅរថយន្តមកជួយអន្តរាគមន៍បាញ់ពន្លត់។ ភ្លាមៗនោះអាជ្ញាធរមូលដ្ឋានខណ្ឌឬស្សីកែវក៏បានចុះទៅអន្តរាគមន៍ដោយនាំគ្នាយកបំពង់ពន្លត់អគ្គីភ័យបាញ់ពន្លត់អស់ជាច្រើនបំពង់ហើយភ្លើងបានរលត់ទៅវិញ។
នៅក្នុងហេតុការណ៍នោះដែររថយន្តពន្លត់អគ្គីភ័យចំនួន១គ្រឿងបានទៅអន្តរាគមន៍ផងដែរតែពុំបានបាញ់ពន្លត់នោះទេដោយសារតែប្រជាពលរដ្ឋ និងអាជ្ញាធរនាំគ្នាយកបំពង់ពន្លត់អគ្គីភ័យបាញ់ពន្លត់ទប់ស្កាតទាន់។
ទាក់ទិននឹងការកើតមានអគ្គីភ័យផ្សែងហុយទ្រលោមនេះត្រូវបាននគរបាលមូលដ្ឋានឲ្យដឹងថា បណ្ដាមកពីម្ចាស់ផ្ទះដាំស្លទុកចោលរហូតដល់ខ្លោចឆ្នាំងហុយទ្រលោមក្លាយជាអគ្គីភ័យ៕
