ឯកឧត្តម ឧត្តមសេនីទោ ខូវ ឆាយ ប្រធានសហព័ន្ធ កីឡាប្រដាល់គុនខ្មែរ បានប្រកាសនៅក្នុងសន្និសិទសារព័ត៌មាន នាព្រឹកថ្ងៃទី១ ខែ មេសាថា សហព័ន្ធកីឡាប្រដាល់គុនខ្មែរ នឹងដឹកនាំកីឡាករកីឡាការិនីប្រដាល់គុនខ្មែរចំនួន ៤រូបទៅប្រកួតនៅលើទឹកដីសហរដ្ឋអាមេរិក ក្នុងទីក្រុងឡុងបិច រដ្ឋកាលីហ្វញ៉ា នៅ៦ល្ងាចថ្ងៃទី១២ ខែមេសា ឆ្នាំ២០២៥ ត្រូវនិងថ្ងៃទី១៣ ខែមេសា ២០២៥ ម៉ោង៨ព្រឹក នៅកម្ពុជា។
ឯកឧត្តម ប្រធានសហព័ន្ធថា នេះជាបេសកម្មគ្រុឌគុនខ្មែរលើកទី១ ដឹកនាំកីឡាករកីឡាការិនីគុនខ្មែរទៅប្រកួតលើទឹកដីអាមេរិកជាលក្ខណៈទ្រុងទ្រាយធំ ហើយនេះក៏ជាប្រវត្តិសាស្រ្តរបស់កម្ពុជាលើកទី១ដែលសហព័ន្ធបានដឹកនាំគុនខ្មែរទៅធ្វើការប្រកួតនិងផ្សព្វផ្សាយលើទឹកដីប្រទេសមហាអំណាចសហរដ្ឋអាមេរិកដែលមានប្រជាជនចម្រុះជាតិសាសន៍ក្នុងនោះក៏មានជនជាតិខ្មែរយើងរស់នៅច្រើនផងដែរ។ ដូច្នោះការផ្សព្វផ្សាយគុនខ្មែរទៅលើទឹកដីប្រទេសអាមេរិកនេះ គឺជារឿងចាំបាច់បំផុតមួយដែលគុនខ្មែរយើងត្រូវធ្វើដើម្បីឱ្យប្រជាពលរដ្ឋដែលរស់នៅក្នុងប្រទេសអាមេរិកមានប្រជាជនចម្រុះជាតិសាសន៍ជាង៣រយលាននាក់បានស្គាល់ ដែលជាការបញ្ជាក់ថា គុនខ្មែរមានលទ្ធភាពទៅដល់គ្រប់ទិសទី។
ឯកឧត្តម ខូវ ឆាយ បានគូសបញ្ជាក់ថា អ្នកប្រដាល់គុនខ្មែរទាំង ៤រូបនេះ គឺកីឡាការិនី អេ យ៉ានុត, កីឡាករ ពេជ្រ សម្បត្តិ, រឿង សោភ័ណ្ឌ និងធន់ រិទ្ធី ដោយអ្នកទាំង៤ នឹងត្រូវប្រកួតជាមួយគូប្រកួតជាជនជាតិអាមេរិកទាំងអស់ ដែលពួកគេសុទ្ធសឹងតែអ្នកប្រដាល់កម្រិតខ្ពស់ដូចៗគ្នាតែម្តង។
អ្នកប្រដាល់គុនខ្មែរទាំង៤រូបនឹងត្រូវប្រកួតដណ្តើម ខ្សែក្រវាត់ ក្នុងនោះកីឡាការិនី អេ យ៉ានុត និងកីឡាករ រឿង សោភ័ណ្ឌ ដណ្តើមខ្សែក្រវាត់ កម្ពុជា-អាមេរិក ដែលនាំពីខ្សែក្រវាត់នេះនាំចេញពីកម្ពុជាទៅ ក្នុងលក្ខខណ្ឌ ៣ទឹក។ ចំពោះ ធន់ រិទ្ធី និងពេជ្រ សម្បត្តិ នឹងប្រកួតដណ្តើមខ្សែក្រវាត់ WCK Kun Khmer ប្រចាំសហរដ្ឋអាមេរិក ក្នុងលក្ខខណ្ឌ៥ទឹក ដោយប្រើប្រាស់ច្បាប់ប្រដាល់គុនខ្មែរដូចៗគ្នា។
ប្រធានសហព័ន្ធរូបនេះបានសង្កត់ធ្ងន់ទៀតថា ការរៀបចំការប្រកួតក្នុងព្រឹត្តិការណ៍នៅអាមេរិកនេះ គឺចាប់ដៃគូជាមួយស្ថាប័ន WCK ដែលមានអាជ្ញាបណ្ណរៀបចំការប្រកួតនៅអាមេរិក ជាពិសេសនៅរដ្ឋកាលីហ្វញ៉ាតែម្តង ខណៈការប្រកួតនេះគឺប្រើឈ្មោះគុនខ្មែរទាំងស្រុងតែម្តង រាប់ទាំងការតុបតែងលម្អ ក្រោមការឧបត្ថម្ភរបស់ក្រុមហ៊ុន វឌ្ឍនៈប្រ៊ូវើរី ភេស្ជជៈគ្រុឌនេះតែម្តង។
សូមបញ្ជាក់ថា យុទ្ធនាការផ្សព្វផ្សាយគុនខ្មែរលើទឹកដីអាមេរិកនេះ ក្រុមហ៊ុនវឌ្ឍនៈប្រ៊ូវើរី ភេស្ជជៈគ្រុឌនិងឧបត្ថម្ភលើការដឹកនាំកីឡាករកីឡាការិនីគុនខ្មែរទៅប្រកួតពីរលើក ដោយលើកទី១ ប្រកួតនៅថ្ងៃទី១២ខែ មេសា ឆ្នាំ២០២៥ ត្រូវនិងថ្ងៃទី១៣ ខែមេសា ២០២៥ ម៉ោង៨ព្រឹក នៅកម្ពុជា និងលើកទី២ ប្រកួតនៅថ្ងៃទី៣១ ខែឧសភា ឆ្នាំ២០២៥ រដ្ឋវ៉ាស៊ីតោនសហរដ្ឋអាមេរិច៕
