កណ្តាល ៖
សមត្ថកិច្ចស្រុកស្អាង បានបង្ក្រាបនិងឃាត់ខ្លួន ជនសង្ស័យម្នាក់ ដោយសារឥទ្ធិពលនៃការប្រើប្រាស់គ្រឿងញៀន ហ៊ានគម្រាមថានឹង សម្លាប់ម្តាយខ្លួនឯង ដោយហេតុការកូនរមិលគុណម្តាយនេះ បានកើតហេតុ កាលពីវេលាម៉ោង ០៦និង១៥នាទី ថ្ងៃទី៣១ ខែមីនា ឆ្នាំ២០២៥ នៅចំណុច ផ្ទះស្ត្រីរងគ្រោះស្ថឹតក្នុងភូមិបឹងខ្ពប ឃុំខ្ពប ស្រុកស្អាង ខេត្តកណ្តាល និងត្រូវបានសមត្ថកិច្ចស្រុកស្អាងបង្ក្រាបនិងឃាត់ខ្លួន យោងពាក្យបណ្តឹងរបស់ម្តាយ( ស្ត្រីរងគ្រោះ) នៅវេលាម៉ោង០៨ ថ្ងៃទី០២ ខែមេសា ឆ្នាំ២០២៥។ សមត្ថកិច្ចស្រុកស្អាងបានប្រាប់អោយដឹងថា ស្ត្រីរងគ្រោះ មាន
ឈ្មោះ គី នឿន អាយុ ៥៤ឆ្នាំ ជនជាតិខ្មែរ មុខរបរ កសិករ (ត្រូវជាម្តាយបង្កើត)។ ចំនែកជនសង្ស័យមាន ឈ្មោះ ចូច ងន ភេទប្រុស អាយុ ២៦ ឆ្នាំ មុខរបរ មិនពិតប្រាកដ ត្រូវជាកូនបង្កើតរបស់ស្ត្រីរងគ្រោះ ( ធ្វើតេស្តរកសារធាតុញៀន វិជ្ជមាន+) មានទីលំនៅក្នុងភូមិឃុំ កើតហេតុ ជាមួយម្តាយ ។
វត្ថុតាងចាប់យក កាំបិតបុ័ងតោចំនួន០១ដេីម ដងឈេីមានប្រវែង ០,១៣ម៉ែត្រ និងផ្លែដែក មានប្រវែង ០.១៧ម៉ែត្រ។
សមត្ថកិច្ចបានប្រាប់បន្ថែមទៀតថា ជនសង្ស័យជាមនុស្សប្រើប្រាស់គ្រឿងញៀនជាប្រចាំនិងតែងតែរករឿងឡូឡា វាយបំផ្លាញទ្រព្យសម្បត្តិក្នុងផ្ទះ ជេបញ្ចោរ និងយកកាំបិតបុ័ងតោរកកាប់សម្លាប់ទៅជនរងគ្រោះ ជាម្តាយបង្កើត ជាញឹកញាប់។
កាលពីថ្ងៃទី ៣១ ខែ មីនា ឆ្នាំ ២០២៥ វេលាម៉ោង ០៦ និង ១៥ នាទី ជនរងគ្រោះកំពុងដេកនៅលើផ្ទះ ពេលនោះជនសង្ស័យបានស្រែកជេរឡូឡា ហើយជនរងគ្រោះក៏បានចុះពីលើផ្ទះមកដល់ដី ជនសង្ស័យក៏បានមកប្រតាយប្រតប់ និងបានយកដំបងឈើវាយ ស្ត្រីជាម្តាយ ត្រូវពីដំបងចំជង្គង់ ចំភ្លៅ បណ្តាលអោយមានស្នាមជាំ និងស្រែកគំរាមកំហែង រកសម្លាប់ម្តាយ ថែមទៀតផង ហើយស្ត្រីរងគ្រោះ ក៏បានរត់ចេញពីផ្ទះ ទៅរស់នៅផ្ទះបងប្អូនមួយរយៈខ្លី ។
លុះនៅថ្ងៃទី ០២ ខែ មេសា ឆ្នាំ ២០២៥ វេលាម៉ោង ០៨ និង ០០ នាទីព្រឹក ដោយទ្រាំនិងទង្វេីរបស់ជនសង្ស័យមិនបាន ជនរងគ្រោះក៏បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលខ្ពប ឲ្យជួយអន្តរាគមន៍ ។
ក្រោយទទួលបានពាក្យបណ្ដឹងភ្លាម កម្លាំងប៉ុស្តិ៍បានសហការជាមួយកម្លាំងប្រជាការពារបានចុះទៅដល់កន្លែងកើតហេតុ នាំខ្លួនជនសង្ស័យយកមកប៉ុស្តិ៍ដើម្បីធ្វើការសាកសួរ។
បច្ចុប្បន្នជនសង្ស័យត្រូវបានឃាត់ខ្លួន និងបញ្ជូនមកអធិការដ្ឋាននគរបាលស្រុកស្អាងដើម្បីកសាងសំណុំរឿងចាត់ការតាមនីតិវិធី៕
.
