ការប្រកួត មីសស៊ុប្រាណេហ្សិនណលខេមបូឌា (Miss Supranational Cambodia) សម្រាប់ឆ្នាំ២០២៥ ដែលជារដូវកាលថ្មី ក្រោមការដឹកនាំ និងគ្រប់គ្រងដោយ លោក AB Vanna បានរកឃើញម្ចាស់ជ័យលាភីដ៏មានគុណតម្លៃហើយ គឺបានទៅលើកញ្ញា ឈុំ ចាន់ដារ៉ា។ យ៉ាងណាមិញ ក្រោយពេលប្រកួតប្រជែងយ៉ាងតឹងតែងទៅលើវិញ្ញាសារផ្សេងៗជាមួយបេក្ខនារីជើងខ្លាំងជាច្រើនរូប ដែលពោរពេញដោយសមត្ថភាព និងចំណេះដឹង ដារ៉ា នៅតែធ្វើបានល្អគ្រប់វិញ្ញាសារ ដែលកាន់តែធ្វើឱ្យអ្នកគាំទ្ររបស់ខ្លួនកាន់តែមានភាពជឿជាក់ទៅលើការប្រកួតមួយនេះ។ នៅក្នុងថ្ងៃផ្តាច់ព្រ័ត្រ កញ្ញា ឈុំ ចាន់ដារ៉ា និងបេក្ខនារីបួនរូបផ្សេងទៀត ដែលជាបេក្ខនារីកំពូលទាំងប្រាំ បានប្រឹងប្រែងបញ្ចេញសមត្ថភាពចំណេះដឹង តាមរយៈការឆ្លើយសំណួរដែលខាងកម្មវិធីបានដាក់ឱ្យ មានភាពល្អៗរៀងខ្លួន។ ដោយឡែក នៅក្នុងការឆ្លើយសំណួររបស់ ដារ៉ា គឺមានភាពទាក់ទាញ និងធ្វើបានល្អបំផុត រហូតទាក់ចិត្តគណៈកម្មការ និងបានឈ្នះមកុដមានតម្លៃដ៏មហាសាលនេះនៅក្នុងរាត្រីផ្តាច់ព្រ័ត្រផ្ទាល់តែម្តង។ ជាមួយគ្នានេះ ម្ចាស់ជ័យលាភីលេខមួយ កញ្ញា ឈុំ ចាន់ដារ៉ា នឹងទទួលបានអត្ថប្រយោជន៍ជាច្រើនពីការប្រកួត ពោលគឺ ទទួលបានមកុដកត្តិយសដែលមានឈ្មោះថា “មកុដនៃការងើបឡើងវិញ - Crown of Awakening” ប្រាក់រង្វាន់ 30,000$ វគ្គបណ្តុះបណ្តាលការដើរបង្ហាញម៉ូត និងអត្ថប្រយោជន៍ផ្សេងៗជាច្រើនទៀតផងដែរ។
គួរឱ្យដឹងដែរថា កញ្ញា ឈុំ ចាន់ដារ៉ា ជាម្ចាស់ជ័យលាភីលេខមួយ ពីកម្មវិធី Freshie Girls ជំនាន់ទី១៨ ឆ្នាំ២០១៩ ជាតារាសម្តែង ជាសិស្សដែលបានបញ្ចប់ការសិក្សាថ្នាក់បរិញ្ញាបត្រផ្នែក អាឃិថេកធឺរ៉ល ឌីហ្សាយន៍ (Architectural Design) ពីសាកលវិទ្យាល័យភូមិន្ទវិចិត្រសិល្បៈ និងធ្លាប់ត្រូវបានតែងតាំងជា Miss Supranational Cambodia ឆ្នាំ២០២៤ ប៉ុន្តែបវរកញ្ញារូបនេះត្រូវបានខកខានការចេញទៅប្រកួតដោយមានបញ្ហាទិដ្ឋាការ៕
