កាលពីថ្ងៃទី ២៧ ខែមីនា កន្លងទៅ Nexflix បានចេញមកអះអាងពីដំណើរការនៃការផលិតខ្សែភាពយន្តថ្មីមួយដែលមានចំណងជើងថា ស្គែនឌល (Scandals) (ឈ្មោះមិនផ្លូវការ) ព្រមទាំងបានប្រកាស Line Up តារាសម្តែងលំដាប់ជួរមុខ ដូចជា ស៊ុន យ៉េជីន (Son Ye Jin), ជី ឆាង វុក (Ji Chang-wook), និង ណាណា (Nana) ដែលនឹងត្រូវចូលរួមសម្តែងនៅក្នុងរឿងមួយនេះផងដែរ។ ខ្សែភាពយន្តខាងលើមានការដឹកនាំពីផលិតករដ៏ល្បីគឺ ចុង ជីវ៉ូ ដែលធ្លាប់បានសាងស្នាដៃនៅក្នុងខ្សែភាពយន្ត សាំបឹឌី (Somebody) និង ភាពយន្ត ធូន អ៊ីន ហ្វ័រ ឡឺប (Tune in For Love) ជាដើម។
ខ្សែភាពយន្ត ស្គែនឌល (Scandals) ត្រូវបានដកស្រង់ចេញពីភាពយន្តកូរ៉េដ៏ល្បីល្បាញ ដែលមានឈ្មោះថា អាន់ថូលដ៍ ស្គេនឌល (Untold Scandal) ដែលបានចេញផ្សាយក្នុងឆ្នាំ ២០០៣។ នៅក្នុងសាច់រឿងនេះ បានកើតឡើងនៅក្នុងសម័យចូសន់ គឺជាសម័យកាលមួយដែលបំណងប្រាថ្នាត្រូវបានកំណត់យ៉ាងតឹងរ៉ឹង។ រឿងនេះនឹងនាំទស្សនិកជនចូលទៅកាន់ល្បែងស្នេហ៍ ដែលមានទាំងភាពងប់ងល់ និងគ្រោះថ្នាក់ របស់តួសម្តែងដែលត្រូវជំនះនឹងគំនាបសង្គម។
គួរបញ្ជាក់បន្ថែមថា ខ្សែភាពយន្ត ស្គែនឌល (Scandals) ចាត់ទុកថាជាខ្សែភាពយន្តបុរាណខ្នាតធំមួយ របស់ Nexflix ដែលមានការចូលរួមសម្តែងពីតារាល្បីៗប្រចាំប្រទេសកូរ៉េខាងត្បូង ដែលមានដូចជា ស៊ុន យ៉េជីន (Son Ye Jin), ជី ឆាង វុក (Ji Chang-wook), និង ណាណា (Nana) និងតារាកិត្តិយសជាច្រើនរូបទៀតផងដែរ៕
