បន្ទាយមានជ័យ ៖ 

រថយន្តលុចស៊ីសRX300 បុកម៉ូតូបើកធ្លាក់ប្រឡាយ អ្នកជិះម៉ូតូធ្លាយពោះវៀន រងរបួសធ្ងន់ ម៉ូតូខ្ទេចមើលមិនយល់ រថយន្តដាច់កងធ្លាក់ប្រឡាយទៅមុខមិនរួច កើតហេតុនៅថ្ងៃទី០១ ខែមេសា ឆ្នាំ២០២៥ នៅក្នុងភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។

អ្នកឃើញហេតុការណ៍ប្រាប់ថា៖ នៅពេលគ្រោះថ្នាក់ចរាចរណ៍កើតឡើងមានអ្នកជិះម៉ូតូម៉ាកហុងដាឌ្រីម១គ្រឿងតាមផ្លូវជាតិលេខ៦ទិសដៅពីកើតមកលិច ហើយមានរថយន្តលុចស៊ីសRX.300ពាក់ផ្លាកលេខបន្ទាយមានជ័យ 2A-9917បានបើកបរបញ្ច្រាស់ទិសគ្នាពីលិចមកកើត ក្នុងល្បឿនលឿនបានរ៉េចង្កូតទៅបុកអ្នកជិះម៉ូតូបណ្តាលធ្លាក់ចូលប្រឡាយខាងឆ្វេងដៃពីក្រុងសិរីសោភ័ណទៅស្រុកព្រះនេត្រព្រះបណ្តាលឲ្យធ្លាយពោះវៀនខាងឆ្វេងអ្នកជិះម៉ូតូ ។

ក្រោយគ្រោះចរាចរណ៍កើតឡើងភ្លាមៗឃើញមន្ត្រីនគរបាលចរាចរណ៍ផ្លូវគោកខេត្តបន្ទាយមានជ័យ ចុះជួយអន្តរាគមន៍ពិនិត្យវាស់វែងមូលហេតុគ្រោះចរាចរណ៍កើតឡើងបង្កដោយរថយន្តលុចស៊ីសបានបុកអ្នកជិះម៉ូតូបណ្តាលរបួសធ្ងន់ត្រូវបានសង្គ្រោះទៅកាន់មន្ទីរពេទ្យព្រោះក្នុងស្ថានភាពធ្ងន់ធ្ងរធ្លាយពោះវៀនចំណែកអ្នកបើកបររថយន្តត្រូវគេចខ្លួន ។

មន្ត្រីនគរបាលចរាចរណ៍បានបញ្ជាក់ថា៖ ក្រោយពិនិត្យវាស់វែងហើយរថយន្តដែលបង្កបណ្តាលអោយបាក់កង់មុខទាំងពីរហើយកំពិតមុខខូចខាតធ្ងន់ធ្ងរ និងម៉ូតូខូចខ្ទេចត្រូវយកទៅរក្សាទុកនៅស្នងការដ្ឋាននគរបាលខេត្តបន្ទាយមានជ័យដើម្បីអនុវត្តន៍តាមច្បាប់ចរាចរណ៍ផ្លូវគោក ៕