សាលាក្តីឧក្រិដ្ឋកម្មអន្តរជាតិ (ICT) របស់ប្រទេសបង់ក្លាដែស បានចោទប្រកាន់អតីតនាយករដ្ឋមន្ត្រីប្រទេសបង់ក្លាដែស លោកស្រី សៀក ហាស៊ីណា និងមន្ត្រីជាន់ខ្ពស់ពីររូបទៀត ជុំវិញបទឧក្រិដ្ឋកម្មប្រឆាំងមនុស្សជាតិ ដែលជាប់ពាក់ព័ន្ធទៅនឹងការបង្រ្កាបដ៏សាហាវទៅលើហ្វូងបាតុករ អំឡុងពេលនៃការធ្វើបាតុកម្មបះបោរកាលពីខែកក្កដាឆ្នាំមុន។ លោកស្រី ហាស៊ីណា ដែលបានភៀសខ្លួនទៅកាន់ប្រទេសឥណ្ឌា បន្ទាប់ពីការបះបោរដែលដឹកនាំដោយក្រុមនិស្សិតកាលពីឆ្នាំមុននោះ ត្រូវប្រឈមមុខនឹងការចោទប្រកាន់ជាច្រើនករណី ដោយកាលពីដើមខែនេះ នៅក្នុងសេចក្តីសម្រេចដាច់ដោយឡែកមួយ លោកស្រី ត្រូវបានកាត់ទោសឲ្យជាប់ពន្ធនាគាររយៈពេល 6 ខែពីបទមើលងាយសាលាក្តីឧក្រិដ្ឋកម្មអន្តរជាតិ។ គួរបញ្ជាក់ផងដែរថា លោកស្រី ហាស៊ីណា ដែលបច្ចុប្បន្ននេះ រស់នៅក្នុងការនិរទេសដោយខ្លួនឯងនៅក្នុងប្រទេសឥណ្ឌា បន្ទាប់ពីគ្រប់គ្រងប្រទេសអស់រយៈពេល 15 ឆ្នាំ បានច្រានចោលការចោទប្រកាន់របស់សាលាក្តីនេះថាជាហេតុផលនយោបាយ។
