អ្នកគាំទ្រជាច្រើនបាននិងកំពុងផ្តល់កម្លាំងចិត្តទៅកាន់តារាចម្រៀង “ចាស្ទីន ធីមប៊ើឡេក” (Justin Timberlake) បន្ទាប់ពីលោកបានបង្ហាញប្រាប់ជាសាធារណៈនៅលើបណ្តាញសង្គម កាលពីថ្ងៃទី ៣១ ខែកក្កដា ឆ្នាំ ២០២៥ ថា មានជំងឺសើស្បែក (Lyme Disease) ក្រោយធ្វើការពិនិត្យរោគវិនិច្ឆ័យ ខណៈពេលដែលលោកកំពុងធ្វើការប្រគុំតន្ត្រីទេសចរណ៍នៅជុំវិញពិភពលោក ដែលការប្រគុំតន្ត្រីនោះមានឈ្មោះថា “ហ្វ័រហ្កេត ធូម័ររ៉ូ វ៉ើលដ៍ ធួរ៍” (Forget Tomorrow World Tour)។
ព័ត៌មាននេះបានធ្វើមនុស្សជាច្រើនមានការចាប់អារម្មណ៍ ក៏ព្រោះតែជារៀងរាល់ឆ្នាំ ជំងឺនេះបានប៉ះពាល់មនុស្សប្រមាណជា ៥០ ម៉ឺននាក់នៅសហរដ្ឋអាមេរិក។ នេះបើយោងតាមការផ្តល់ទិន្នន័យពីមជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក (CDC)។
តារាចម្រៀងរូបនេះបាននិយាយថា៖ “ប្រសិនបើអ្នកធ្លាប់កើតមានជំងឺនេះ ឬអ្នកស្គាល់នរណាម្នាក់ដែលបានកើតមានជំងឺនេះ អ្នកនឹងយល់ថាវាពិបាកប៉ុណ្ណា ទាំងផ្លូវកាយ និងផ្លូវចិត្ត។ ពេលដឹងលទ្ធផលដំបូង ខ្ញុំតក់ស្លុតខ្លាំងណាស់ ប៉ុន្តែយ៉ាងហោចណាស់វាក៏បានធ្វើខ្ញុំឱ្យដឹងថា ហេតុអ្វីពេលដែលខ្ញុំនៅលើឆាកប្រគុំតន្ត្រី ខ្ញុំតែងតែឈឺចាប់សរសៃប្រសាទ អស់កម្លាំង និងមានអាការឈឺដែលមិនអាចពន្យល់បាន។
យ៉ាងណាមិញបើទោះបីជា “ចាស្ទីន ធីមប៊ើឡេក” (Justin Timberlake) មិនបានផ្តល់នូវព័ត៌មានលម្អិតពីការកើតជំងឺមួយនេះក្តី ប៉ុន្តែអ្នកគាំទ្ររបស់លោកបែរជាមានការចាប់អារម្មណ៍ទៅលើជំងឺសើស្បែក (Lyme Disease) នេះទៅវិញ ក៏ព្រោះតែជំងឺនេះវាអាចបណ្តាលមកពីមេរោគដែលចម្លងចេញពីសត្វចៃមានផ្ទុកបាក់តេរីមួយប្រភេទ ហើយប្រសិនបើមិនបានព្យាបាលត្រឹមត្រូវនោះទេ វាអាចរាលដាលដល់សន្លាក់ បេះដូង និងប្រព័ន្ធសរសៃប្រសាទជាដើម៕
