ភ្នំពេញ៖ នៅព្រឹកថ្ងៃទី១០ ខែឧសភា ឆ្នាំ២០២៦ វេលាម៉ោង៩:០០នាទី សហព័ន្ធកីឡាបាល់ទះកម្ពុជា បានរៀបចំសន្និសីទសារព័ត៌មានស្ដីពីការរៀបចំព្រឹត្តិការណ៍ប្រកួតកីឡាបាល់ទះ «តេជោលីគ» (Techo Volleyball Cambodia League) រដូវកាលទី៣ នៅមជ្ឈមណ្ឌលជាតិហ្វឹកហ្វឺនកីឡា។
កម្មវិធីនេះ ស្ថិតក្រោមអធិបតីភាព លោកបណ្ឌិត អាំង សិរីពិសិដ្ឋ អនុប្រធាន អគ្គលេខាធិការ និងជាប្រធានគណៈកម្មការរៀបចំការប្រកួត តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជា។
ក្នុងសន្និសីទនេះ ក៏មានការចូលរួមពីថ្នាក់ដឹកនាំ មន្ត្រីសហព័ន្ធ អ្នកឧបត្ថម្ភគាំទ្រ លោក Frank Josef Brune Brew Master of Ganzberg Beer អ្នកសារព័ត៌មាន ព្រមទាំងប្រតិភូ គ្រូបង្វឹក និងកីឡាករមកពីសមាគម-ក្លិបកីឡាបាល់ទះចំនួន ៨ក្រុម រួមមាន៖
១. ក្លិបបាល់ទះបញ្ជាការដ្ឋានអង្គរក្ស
២. សមាគមកីឡាបាល់ទះវិសាខា
៣. សមាគមកីឡាបាល់ទះក្រសួងមហាផ្ទៃ
៤. ក្លិបបាល់ទះស្នងការដ្ឋាននគរបាលខេត្តស្វាយរៀង
៥. ក្លិបបាល់ទះស្នងការដ្ឋាននគរបាលរាជធានីភ្នំពេញ
៦. ក្លិបបាល់ទះកងពលធំអន្តរាគមន៍លេខ៣
៧. ក្លិបបាល់ទះស្នងការដ្ឋាននគរបាលខេត្តកោះកុង
៨. ក្លិបបាល់ទះស្នងការដ្ឋាននគរបាលខេត្តព្រះសីហនុ។
សម្រាប់ការប្រកួតឆ្នាំនេះ ត្រូវបានរំពឹងថានឹងកាន់តែមានភាពស្វិតស្វាញ រំភើប និងទាក់ទាញ ដោយមានការចូលរួមពីកីឡាករកម្ពុជា និងកីឡាករបរទេសដែលមានគុណភាពខ្ពស់ ដើម្បីរួមចំណែកលើកកម្ពស់វិស័យកីឡាបាល់ទះកម្ពុជាឱ្យកាន់តែរីកចម្រើន និងឈានទៅកាន់កម្រិតអន្តរជាតិ។
សូមបងប្អូនអ្នកគាំទ្រកីឡាបាល់ទះទាំងអស់ ត្រៀមចូលរួមគាំទ្រ និងផ្ដល់កម្លាំងចិត្តដល់ក្រុមដែលលោកអ្នកពេញចិត្ត ក្នុងព្រឹត្តិការណ៍កីឡាបាល់ទះដ៏ធំបំផុតប្រចាំឆ្នាំនេះ។
រូបភាពពី៖ សហព័ន្ធកីឡាបាល់ទះកម្ពុជា
